Shaduh ki ri Arab poi u synsar bad sla tyrpad ba mih na ki thaiñ Mawsynram

0

Shillong, Nohprah 21 : U MLA ka Mawsynram constituency u ba dang shu hiar shuki shen bad pynïasoh noh sha ka BJP, Bah HM Shangpliang u la ïathuh ba u sla tyrpad bad u synsar kiba mih na Mawsynram ki dei kiba ïaid ïew bha shabar ri khamtam sha ki ri Arab, kata shaduh Qatar bad Oman.
Ïa kane u la ïathuh haba kren ha ka jingïalang shah pynkup burom ha ki nongrep hapoh ka lama jong ka Hills Farmer Union (HFU) Mawsynram Block kaba la long myn ha ka 19 tarik Nohprah 2022 ha Seng Khasi Hall Mawsynram Khliehshnong.
Haba ai jingkren ha kane ka jingïalang kaba la poi da ki spah ngut ki nongrep na ka thaiñ, u Bah HM Shangpliang u la ïathuh ba ïa kane la ïathuh da uwei u nongkhaïi uba la pyntip ba ki mar rep kiba mih na ki riwar jong ka Mawsynram khamtam eh kum u slatyrpad bad synsar ki long kiba bha kiba ïaid ïew bha ban la ju shalan ruh ïa ki sha ki ri Saudi Arabia, Qatar bad Oman.
Nangta u la ïathuh ruh ba la pyntip ïa u ba wat u sohñiamtra ba mih na ki rilum Khasi ki ïaid ïew bha sha kiwei pat ki ri kaba long ka jingsngew sarong kaba khraw ïa ki nongrep na kane ka jylla.
“Nga kwah ba ki nongrep kin long kiba riewspah kumba riewspah ki nongrep ha Punjab, Haryana namar ki kamai da ki klur kat haduh ban kin phah skul bha ïa ki khun,” u la ong.
Ha kajuh ka por u la ai khublei ruh ïa u Myntri Rangbah ka jylla, Conrad K Sangma uba la sngap ïa ka jingkren jong u ha Iing Dorbar na ka bynta ban ithuh noh ïa kitei ki jait mar rep kiba mynta ka dor jong ki ka la kiew bad pynkmen haduh katta katta ïa ki nongrep.
La donlang ruh ha kane ka sngi naduh u President jong ka HFU Sengkmie, ki nongkitkam bad ki nongrep na kylleng ki shnong ka Mawsynram constituency kiba la wan pynshngain ha kane ka jingïalang.
Kane ka jingïalang ban pynkup burom ïa u bah HM Shangpliang ka dei namar ki sngewburom haba u ju kren ïa ka jingeh jong ki nongrep ha ïingdorbar Thawain bad uba la lah ban pynkohnguh ia ka sorkar jylla ban pynkylla mar rep ïa ki mar khlaw kum u synsar, slatyrpad bad u sohmrit kaba kine ki mar rep mynta ki la heh bha ka dor ha ïew.

Leave A Reply

Your email address will not be published.