Shillong, Nohprah, 21: U MLA jong ka Bharatiya Janata Party (BJP) u Bah Sanbor Shullai uba long ruh u Myntri ka Sorkar Jylla ha ka sngi Balang u la ong ba ka BJP kan sa khlaiñbor kum u Kulai ïong ha ka Elekshon sha ka Ingdorbar Thawaiñ ka ban sa long ha u snem 2023 ha kane ka Jylla Meghalaya.
“Ka BJP kan sa leh bha kham palat ban ïa kaba khmihlynti khamtam ha rilum Garo, da ka jingpynïasoh jong kiba bun ki MLA bad ki MDC barim. Ngin sa pynthikna ba kan dei ka jingïakhun kaba tyngeh ha kiba bun ki Seat ha kaba ngin sa ïoh thaw ïa ka Sorkar bad ki seng saiñpyrthei kiba ïahap jingmut bad ngin sa pynïaid ïa ka jylla ha ka lynti kaba dei katkum ka jingangnud jong u Myntri Rangbahduh ka ri u Narendra Modi,” ong u Bah Shullai ha u kyrwoh.
“Ki paidbah ki dei ban ‘ailad shisien’ïa ka BJP namarba ki ladep mad ïa kiwei ki party bad ki la ïohi ruh dalade ïa ka resol. Lada ki paidbah ki lah ban ailad ïa kiwei ki seng saiñpyrthei balei kim ailad tang shisien ïa ka BJP,” la buh jingkylli u Bah Shullai.
“Ki paidbah nong shong shnong kim dei ban ap da ki snem ban pdiang ïa ka BJP namarba ki kabu ksiar ki la nang tuid ei manla ka sngi namarba ka BJP kam don ha ka bor,” u la ong.
“Ngi dei ban sngew thuh ba ki MLA ba la shah jied jong ka BJP ki dei ki khun ka ri kiba mihkhmat ïa ka jingkyrmen bad ka jingangnud jong ki paidbah nongshong shnong ka Jylla hakhmat ka Sorkar Pdeng ba la lamkhmat da ka BJP,” u la ong bad bynrap, “ha ka party jong ngi, bun na ki nongtrei ki dei na ka Niam Khristan. U State President jong ngi, u Bah Ernest Mawrie bad u MLA u Bah Alexander Hek ki dei na ka Balang Catholic bad nga, nga dei na ka Niam Tynrai kaba mihkhmat ïa ka Seng Khasi bad ïa ka Seiñ Raij. U Bah Hek u la ïai buddien ban pynïoh jaka ïa ka KJP Synod ban shna ïa ka iing ha Delhi bad u Bah Mawrie u la long ka sur ban pynsngew ïa ka jingeh jong ka Balang Catholic hakhmat ki nongïalam ha Delhi.”
“Ha kane ka kynti, ka elekshon ka dei ban long ka mat halor ka roi ka par bad ym da ki buit kaba pynlong ïa ki paidbah ban ïohi da kawei pat ka jingkynnoh ba shukor pyrshah ïa ka BJP da ki riewkhwan myntoi shimet. Kum kine ki jingkynnoh lamler kin sa mih binag, hynrei nga pynthikna ba ki paidbah nongthep vote ba shemphang kin sa kyntait mardor ïa ki khubor hamsaïa ban sa pynphriang da ki riewshim kabu,” ong shuh shuh u Bah Shullai.
“Ha kane ka elekshon, to ngin ïakren kumno ban weng ïa ka jingeh jong ki nonghikai, ka jingbym ïoh tulop ki nongtrei ka District Council, kumno ban pynthikna ba ki kam sorkar ba thylli ban pyndap, kumno ban pynneh ïa ka shongsuk shongsaiñ, kumno ban weng ïa ki jingeh ha khappud, kumno ban pynkha bun tylli ki kam ha ki private sector khnang ba ki samla kin ïohkam ïohjam. Nga kular sha ki paidbah nongthep vote ba dei tang ka BJP kaba lah ban ïada ïa ka hok jong ki paid riewlum, ban kyntiew ïa ka ïoh ka kot bad ïa ki kam pynroi bad ban pynneh ïa ka shongsuk shongsaiñ,” la pynkut u Bah Shullai.
