Tura, Nohprah, 21: U Myntri Rangbah ka Jylla u Conrad Kongkal Sangma ha ka Sngi Balang u la plie paidbah ïa ka Batabari Community and Rural Development Block ba thymmai, kaba hap hapoh ka West Garo Hills ha ryngkat ka jingsakhi lang jong u MLA ka Rajabala Constituency u Abdus Saleh.
Haba kren kum u Kongsan, u Conrad Sangma u la pynpaw ka jingsngewkmen hadien ba la lah ban pynurlong ïa ka jingangnud kaba la slem bha jong ki paidbah bad ong ruh ba ka jingplie ïa kane ka C&RD Block ba thymmai kan sa nang pynjan shuh shuh ïa ki jingtreikam jong ka Sorkar sha ki paidbah.
“Ka dei ka thong jong kane ka Sorkar kaba mynta ban pynthikna ba ka roi ka par ka dei ban poi sha ki paidbah kiba im ha ki shnong kiba don sha ki bynta kyndong jong ka jylla bad kane ka C&RD Block kaba thymmai kan sa pynstet ïa ki jingtreikam jong ka Sorkar bad ban pyllait ruh ïa ki skhim sha ki paidbah ha ka por kaba biang,” u la ong.
Ha kane kajuh ka sngi, u Myntri Rangbah ryngkat lang bad ki kynrem ki lyndan u la plie ïa u mawnongrim bad ïa ka Veterinary Dispensary kaba don ha Bhaitbari (Rajpur), West Garo Hills.
Ïa ka Veterinary Dispensary la shna da ka jingbei pisa jong ka NABARD ha ka jinglut kaba kot T.90.4 lak.
U Myntri Rangbah u la sam ruh ïa ka FOCUS+ Card sha ki nongïoh bhah ïa ki syïar Kuroiler hapoh ka PROGRESS scheme.
Nalorkata, u Myntri Rangbah u la ai ruh ïa ka bhah pisa lyngba ka Direct Benefit Transfer sha ki 23,491 ngut ki nongïoh jingmyntoi kaba kot T. 11.75 klur hapoh ka FOCUS+.
