Plie paidbah u CM Conrad ïa ka ïingtreikam bathymmai jong ka Rerapara Block

Shillong, Risaw 20 : U Myntri Rangbah ka Jylla Meghalaya, u Conrad K. Sangma, ha ka Sngi Ba-ar u la plie paidbah ïa ka ophis thymmai jong ka Rerapara Community & Rural Development Block, ha ka jingïadonlang ki MLA ba kynthup naduh u Subir Marak, Sanjay Sangma bad Mehtab Chandee A Sangma.
Ha kane ka sngi, u Myntri Rangbah u la ai burom ïa ka Aking Nokma jong ka Rerapara kaba la ai sngewbha ïa ka jaka ban tei ïa ka ophis thymmai jong ka Block. U la ai khublei ruh ïa ka bad ïa ki paidbah ka shnong na ka bynta kane ka jingsngewbha jong ki.
Ha kane ka prokram la wan ïashim bynta da ki Nokma, ki ophisar jong ka distrik bad ka Block, ryngkat ki nongshong shnong.
U Myntri Rangbah u la buh ruh ïa u mawnongrim ban tei ïa ka surok AMPT (Garobadha sha Tura) bad plie paidbah ïa ka jingkieng ïaid kjat ha Samandalgre, Rerapara.
Haba kren ha ka jingïalang, u Conrad u la ong ba ka ophis Block Development ka dei kawei na ki ophis kaba donkam tam ha ka jingshakri ïa ki paidbah.
“Watla ka Secretariat ka dei ka ophis kaba ha khlieh duh, hynrei haba phai sha ka kam shakri paidbah, ka ophis Block Development ka long kaba donkam tam. Bun na ki skhim bad ki jingshakri paidbah la pyntreikam lyngba ki Block. Lada u BDO bad ki nongtrei jong u ki trei bha, 75 percent na ki jingeh jong ki paidbah lah ban pynbeit,” u la ong.
U la pynkynmaw ba ha ki por ba la dep, jan 70 percent na ki ophis Block ha ka Jylla ki treikam na ki ïing wai kiba rit bad bym biang ka jaka trei na ka bynta ki ophisar bad ki nongtrei.
“Kumno phin lah ban trei bha lada ym don ka jaka trei kaba biang? Haba ngi ïoh ïa ka kabu ban shakri, ngi la rai ban pynbeit ryntih ïa ka rukom treikam jong ka bor synshar bad pynbha ïa baroh ki ophis Block ha ka Jylla. La mang jan T. 200 klur na ka bynta kane. Ym pat ju don kano-kano ka Sorkar kaba la leh kumne mynshwa, hynrei ngi la sdang ïa kane ka rukom treikam thymmai,” u la ong.
U la bynrap ba ka jingpynbha kum kane ka dang ïaid ruh ha kiwei pat ki tnad. La tei thymmai bad pynbha palat 2,000 tylli ki ïing skul sorkar, la pynbha ïa ki thanat bad la ai ïa ki jingtei kiba biang ha ki kolej, kynthup ïa ka Captain Williamson Sangma College ha Baghmara, Williamnagar College bad Nongstoin College.
U Myntri Rangbah u la ong ba u dei u kapten jong ka kynhun Meghalaya, bad u la kyntu ïa ki nongtrei sorkar ba kin trei da ka jingsngewieid, ka jingshaniah bad ka jingtrei hok ïa ki paidbah kiba ki shakri.
“Pynleit jingmut nyngkong eh ha ki paidbah ha baroh ki kam jong phi,” u la ong.
U la pyntip ruh ba ki jingeh bad ki jingdonkam jong ka Rerapara la dep ban buh ha ka thup ba hakhmat eh bad ba la sdang ruh ban shim ïa ki sienjam ban pynbeit ïa ki.
Ka surok AMPT (Garobadha-Tura) ka dei ka surok kaba donkam bha na ka bynta ka jingïasoh bad ka leit ka wan ha Garo Hills. Katba ka jingkieng sdien ha Rerapara ka dei shi bynta jong palat 100 tylli ki jingkieng kum kine kiba dang tei ha kylleng ka Jylla lyngba ka projek kyrpang jong ka Sorkar, ban pynsuk ïa ki paidbah kiba sah ha ki jaka kiba jngai.