Kyntait u MLA ka Mawkynrew ïa ka 5 klur tyngka ba thong ka NPP

Shillong, Nohprah 21 : U Bah Banteidor Lyngdoh, MLA ka People’s Democratic Front (PDF) na Mawkynrew Constituency bad uba dei mynta u Myntri ba dei khmih ïa ka tnad Agriculture, Sports ka Sorkar Meghalaya Democratic Alliance (MDA) u la ïathuh ba u la shah thong haduh 5 klur tyngka ban pynïasoh sha ka National People’s Party (NPP).
Haba kren ha ka jingialang plie ïa ka ophis treikam ka APSTA Mawkynrew Unit ha Lad Kharang, u la ong ba u ieng skhem ha ka nongrim bad un ïai neh bad ïakhun ruh ha ka elekshon MLA 2023 na ka PDF.
Ha shwa ban poi sha katei ka jingiathuh, u la ong ba u kynmaw ïa Bah BB Lyngdoh, bam kwai ha dwar u Blei, uba dei u Myntri Rangbah barim ka Jylla uba la kyntait ia ka jingtyrwa ka Congress bad kiwei pat ki seng saiñ-hima ha kito ki por uba la ong ba kham lah kaba jngi ha i wahduid ba sngur ban ha ki duriaw ba tngit.
“U Bah BB Lyngdoh um treh ïa ki jingtyrwa ba bun rukom na ka Congress bad 52 snem u shong beit ha ka iing sorkar haduh ban da khlad bad neh beit ka seng saiñ-hima na ka Jylla”, u la ong da kaba bynrap ba ka elekshon ba mynta ka la kylla long tamasa.
U la ong ba mynta la wan da ki nongkhaïi bad kumba long ha Nongkrem Constituency u la lap ba la don kiba kit blanket da ki dumper bad sam sha ki paidbah. “Kat kato ka jingrben shaei yn lah ban ïa sait ban ïathad”, u la ong.
Da kaba kdew ba uta u ba ieh ïa ka Mawhati Constituency kaba bun uba duk ba jynjar bad kham shadien ban ïa ka Mawkynrew Constituency, u la ong, ” Phi ong ba phi leit na ka bynta uba duk ba suk hynrei phi iehnoh bad kwah da ka jaka ba duk. Ka dei kaba phim lah bad ban shakri paidbah kam dei kaba suk”.
U la ong ba ka PDF ka dei ka party ka ban ïada ïa ka jaidbynriew bad la seng ia ka ha ka por ba khihwin ka jingshah sloit ka iktiar rangbah shnong bad khlem daw ym lah ban ieh ia ka Party bad kam long kaba bha ban leh arsap ne khwan myntoi hynrei hap ïeng ha ka nongrim.