Khie ka thma FOCUS hapdeng ka UDP bad ka NPP, poi ka jingujor shaduh Election Commission ka Ri

0

Shillong, Nohprah 21 : Ka UDP watla ka trei lang bad ka NPP ha ka sorkar synrop Meghalaya Democratic Alliance (MDA) hynrei tang na ka daw ka skim FOCUS ba ju tip kum ka skim nongrep, mynta ka la poi haduh u pud ba ka la ujor syndon shaduh u Chief Election Commissioner ka Ri ban tuklar lang.
Ha katei ka jingujor, ka UDP lyngba u Vice President jong ka, Bah Allantry Franklin Dkhar, la kdew ba ka jingujor kadei beit ia ki katto katne ki Myntri Sorkar bad ki MLA kiba don ka jingïadei bad ka NPP ba ki pyndonkam bakla ïa ka skim FOCUS bad FOCUS+.
Ha katei ka shithi ba ka UDP ka phah sha u CEC la kdew ruh ba ka katei ka jingleh ka long markhongpong ïa ka jingmut jong katei ka skim kaba long kyrpang na kabynta ban kyntiew ïa ki nongrep ha ka jylla.
Shuh shuh la ong ruh ba katkum katei ka skim, ka jylla Meghalaya ka la pyntreikam ïa ka prokram kaba 200 klur tyngka na ka bynta ban kyrshan ïa ki nongrep kiba hadien ka jingwan syllad ka khlam COVID ki la kynduh ïa ka jingeh kaba khraw.
La kynnoh ruh ba u Myntri Rangbah ka jylla, Conrad K Sangma u la leit ban jngoh bun tylli ki distrik bad ki block kiba don ha ka jylla ha kine ki lai bnai ba la dep.
U ong ruh ba katkum katei ka skim, ïa ki nongrep la kynthup bad pynwan ha ki producer groups bad kumta iwei iwei i dkhot i ïoh 5hajar tyngka khnang ba kan long kum ka bai seng ban ïarap ïa ki nongrep ban pynheh ïa ka kam.
“Kaba paw ba ka don ka jingthut ka long ba ki don ki MLA bad ruh ki Myntri sorkar kiba leit ban sam ïa kine ki skim ha ki jaka kiba ym lah satia wat ban rep ruh. Kane ka pyni ba tang na ka bynta ka jingmyntoi ha ka saiñpyrthei, la pyndonkam bakla ïa ka. Kumta, nga kyntu jur ïa ka ophis treikam jongphi ban shimkhia halor kane bad tuklar noh mardor khnang ban ym knieh noh ia ka hok jong ki nongrep kiba dei hok ban ïoh,” bynrap biang utei u heh UDP ha ka shithi.
Lah ban kdew hangne ba wat na ka liang jong ka Seng BJP ruh ka la kynnoh ba ka skhim FOCUS kadei ka ram ba la shim da ka sorkar MDA na shabar ri bad ki paidbah kiba ïoh ïa kane ka skhim ruh ki hap ban siew ïa ka ram ryngkat ka sut. ïa kane la kynnoh da u President ka BJP, u Bah Ernest Mawrie.

Leave A Reply

Your email address will not be published.