Sngewkhia jur u WS Pyrtakuna ba jur ka dheng kali na ka daw ba sniew palat ka surok ha Narpuh, EJHD

Khliehriat naiwieng 20: U Waheh Shnong Pyrtakuna, u bah L.Bareh, u la pynpaw ka jinsngew khia kaba khraw namar ka jingjur palat ka jingdheng kali ha surok National Highway ha ka thaiñ Narpuh, East Jaiñtia Hills District bad ong ba kane baroh ka dei na ka daw ka jingsniew palat ka surok, ha ka por ba rang ba rkhiang ka surok ka dap dap ka khyndew pum pum bad tang shu hap slap khyndiat ka surok ka dap da ka khyndew ktieh.
Utei u Waheh Shnong u la ong ruh ba ka long kaba sngewsih ba kiba pang ba shitom ruh bunsien ki ju sahkut lang ha kane ka jingdheng kali kaba jur ha ka thaiñ, ki khynnah kiba leit ba wan sha skul kiba ju ïaid da ka kjat naduh shnong Pyrtakuna, Kuliang shaduh Umkiang ruh ki hap mad tang ka khyndew pum pum bad hap ban iaid hapdeng u khyndew pum pum ba jur kaba buh jingma ïa ka koit ka khiah jong ki khynnah.
Da ka jingsngew khia bad sngew bynniaw, u bah Bareh u la iathuh ruh ba ka rukom pyntrei ïa ka surok ruh ka suki haduh katta katta ha kaba ki nongtrei ki shu wan ban buh tang ki tiar ki tar bad ka kam pat ki suki bha ban trei, kane ka jingleh ki nongtrei kiba pyntrei ïa ka surok ka la pynlynga bad pynjynjar jingmut ïa ki paidbah ka thaiñ namar ki paidbah ki mad ïa ka jingdheng kali ba jur bha man ka por na ka daw ka jinglong jingman ka surok kaba la sniew haduh katta katta, kane ka jinglong ka surok ka buh jingma ruh ïa kiba ñiah kali, kiba shong kali bad kumjuh ruh kiba iaid kjat na rud surok.
Bun ki kali ki kylla khongpong ha surok bad ha rud surok bad bun ruh kiba sniew shiteng lynti na ka daw ba sniew palat ka surok, kane ka buh jingeh bad buh jingma ïa kiba ñiah kali bad kiba shong kali.
Ki paidbah ka thaiñ ki shu ap khmih lynti ba lano ka sorkar bad ka NHAI kan weng noh ïa kane ka jingeh ba ki paidbah ki iakynduh jingeh ha ka leit ka wan, nalor ba kane ka surok national highway ka dei ka surok kaba da ki phew hajar tylli ki kali ki iaid man ka sngi kaba dei ruh ka highway kaba pyniasoh bad kiwei kiwei ki jylla kiba mar jan bad ka dei ruh ka surok kaba ki kali kiba heh kiba kit jingkit bad ki kali kiba rit ki iaid, na ka liang u bah L.Bareh u kyntu jur ïa ka sorkar bad ïa ka NHAI ba kin sngewbha ban sngewthuh lem ïa ka jingeh ki paidbah ban pynkloi ïa ka jingpyntrei ïa kane ka surok kaba la sniew bad julor shaba palat.