Pynkut noh ka KSU ïa ka lympung ïalehkai jong ka 2nd Wickliffe Syiem MFT 2023

Mawkyrwat, ‘Naiwieng 20: Ka KSU Ranikor Circle ka la ïoh ban pynhap pyrda noh ïa ka lympung ïalehkai kynjatbol kala tip kum ka 2nd Wickliffe Syiem Memorial Football Tournament 2023 ba la pynïaid da ka KSU Ranikor Rircle lem bad ka KSU Nangnah Unit ha ha madam Mawkyndeng, Nongnah, South West Khasi Hills District.
Ki kynhun kiba la poi sha kaba kut, ki long ka Nongnah – Nongkdait Sports Club bad ka Thiepdiengngan Sports Club, ha kaba ha ka jingïalehkai ka Nongnah – Nongkdait SC ka la long ka lah duh da kaba ka la pynliem noh ïa ka Thiepdiengngan SC da 1 – 0 kol.
Ïa kane ka lympung ïalehkai kynjatbol la sakhi lang da u Shalkitbok Kharbani, Assistant Education Secretary jong ka KSU Central Body, u Poljohn Wanniang, Organising Secretary jong ka KSU South West Khasi Hills District, u Marcony Thongni, President ka KSU Ranikor Circle, ki Myntri Shnong lem bad kiwei kiwei ki riew rangbah.
Ha kajuh hi ka sngi ka la don ruh ka prokram jingpynkup burom ïa ki samla jong ka dong ka thaiñ kiba dei na Shnong Nongnah bad uwei na ka shnong Kenïong, South West Khasi Hills District kiba la wanrah nam bad burom ïa ka shnong ïa ka distrik bad kumjuh ruh ïa ka jylla da kiba la leit ban ïa shimbynta ha ki jingïalehkai bapher bapher kynthup ïa ka samla Greatmercy Langte ka samla kaba la jop ïa ka jingïakop Spark Mrs Northeast India 2023 kaba dang pynlong shen ha Guwahati da kaba wanrah burom lyngba ka jingjop ïa ka Mrs Northeast India Brand Ambassador.
Caption: Ki dkhot ka VPP na Ri Bhoi kiba la mih shakhmat ban ai sngewbha ïa ka snam ha ka Blood Donation Camp mynta ka sngi ha Nongpoh.