Smam dap ka phyllaw KHADC da ki nong Shella ban synran ïa ki kyrtong Wahadadar

Shillong, Naiwieng 27 : Ka phyllaw jong ka KHADC ha ka step sngi Balang, ka 27 tarik ka la dap smam da ki paidbah na Shella Confederacy ban synran ïa la ki kyrtong ban thep kyrteng na ka bynta ka elekshon Wahadadar kaban long ha ka 13tarik Nohprah mynta u snem.
Ha kane ka sngi u kyrtong ba thep kyrteng nyngkong dei u Bah Sotish Youroin, ba dei ruh u Wahadadar ba rim jong ka Confederacy. Ïa kane ka jingthep kyrteng u la pyndep ha kamra u Returning Officer Bah C Pohlong ba dei ruh u Deputy Secretary jong ka Executive Committee.
Kiwei ki kyrtong kiba kwah ban aireng ki hap ban pyndep ïa ka jingthep kyrteng hapoh ka 4:00 baje janmiet jong ka sngi Palei ka 28tarik mynta u bnai.
Na ka liang u Kyrtong haba kren hadien ba u la dep ban thep kyrteng u la ïathuh ba ki don shibun kiei kiei kiba kum u Wahadadar u kwah ban pynbha shuh shuh na bynta ka bha ka mïat jong ki nongshong shnong ka Confederacy.
“Nga kyntu ïa ki paidbah na ka Confederacy ba kin pyndep ïa ka hok jong ki ban jied ïa u Wahadadar ba pura,” ong u Bah Sotis.
Ha kajuh ka por na ka liang u Deputy CEM ba dei peit ïa ka tnad Elaka, Bah Pynshngain N Syiem u la ïathuh ba kadei hok ïa ki paidbah ban shongshit bad kmen da kaba wan synran ïa ki kyrtong namar ka dei hadien 15 snem ei ei ba ki ïoh biang ïa ka lad ban jied ïa u Wahadar ba pura ha Shella Confederacy.
Haba kren pat halor ka jingpynkhreh na bynta ka elekshon u Deputy CEM u la ïathuh ba dei da ka jingtrei met bad mynsiem ba khatduh ki la lah ban pynlong ïa katei ka elekshon kaba khlem lah ban pynlong wat hadien 15 snem.
U la ïathuh ruh ba ka Council ka la pynkhreh shaid shaid na bynta ki jingdonkam baroh khamtam haba ki nongthep vote ki la poi palat 7000 ngut.