Nongstoiñ, Naiwieng, 27: Ka kam ban sumar bad pynkoit ïa ki ba pang ba shitom da ki jait dawai kynbat kiba im ha ki khlaw ki btap, ki riat ki ram kiba don ha pneh ka mei mariang, ka dei ka ba la prat lynti da ki longshuwa manshuwa bad kaba dang neh bad bteng haduh kine ki sngi, ong u bah K.Marweiñ uwei na ki riew rangbah na ka shnong Tiehbah West Khasi Hills.
U Bah K.Marweiñ u don ïa ka kper ba u thung ïa ki kynbat dawai kaba heh tam ha West Khasi Hills bad haduh mynta, ki don mynta hynriew phew jait tam ki kynbat ha katei ka jaka rep jong u, nalor ki jait soh ba bun jait kum ki sohlait, soh apple khlaw, sohmat, sohjew, sohlang bad kiwei kiwei ki jait soh.
La lap ba ha ki bynta ba ki don ki dieng kiba jrong bad kynjang bha ki kynbat dawai ki san ki plung bad ki jyrngam bha khrek, hynrei ha ki bynta ba la ot ki ba ki kjat sngi ki shoh bad ka khyndew ka kham long rkhiang bun na ki kynbat dawai kim lah ban san bha ne ban im.
Nalor kata u bah Marweiñ u la ong ba u la sdang ïa katei ka kam ban rep kynbat dawai naduh u snem 2005 bad ka jingtip jong u ïa ki jait kynbat kiba long dawai, ka dei na ka jing hikai jong u kpa jong u ha ryngkat ka sap kaba u Blei u la ai ha u ba un tip kiba kum kino ki jait kynbat kiba long dawai bad kiba dei ban sumar ban pynkoit ïa ki jingpang ba bun jait kum ka baïong khlieh, sahiaw, jyrhoh, dap lyer, pang ring, ïoh bih, pynhiar bad kiwei kiwei ki jait jingpang kiba kham kynrei bad ruh ïa ki jait jingpang kiba shu jia ne ngat teng teng ha ki briew kum ka jingpang ring bad kiwei kiwei.
Utei u rangbah u la kren bynñiaw ruh ha kaba ïadei ban ka jingpom pathar jong ki briew ïa ki khlaw ki btap, ki dieng ki siej ka jingthang dusmon ïa ki lum bad ki khlaw ha ki aïom tlang, ha kaba u la ong ruh ba katei ka jingpom pathar bad thang dusmon kam dei tang ba ka pynjot ïa ki khlaw hynrei ka pynduh jait ïa ki kynbat dawai kiba kordor bad kiba don kam haduh katta katta khamtam eh ïa ki kynbat dawai kiba paka tam na ka bynta kiba kheiñ shyieng, mynsaw bad dkut ki kti ki kjat bad kiwei kiwei.
U la ong ruh ba haba u peit ïa ka jingpynjot pathar ïa ki klhaw ki btap u pang ka mynsiem, hynrei ym lah leh ei ei namar ki nong pynjotki dei hi ki trai jong ki khlaw ki btap. U la ong ba na ka bynta ban pyllait ïa ki nongshong shnong kiba don khlaw na ka jingpom pathar, ka sorkar ka la dei ban thaw lad ban pynsngewthuh ïa ki bad ban shna da ka mang pisa ba kyrpang na ka bynta jong ki, ba kin pynneh pynsah ïa ki khlaw ki btap bad ban pynshlur ruh ba kin thung da ki dieng.
Ha kajuh ka jaka kin rep da ki dawai kynbat kat ba ki lah ban ïoh bad ka jingmyntoi kan long ym tang na kaba supply ïa ki dieng ynda ki la heh, hynrei kaba kham myntoi ka long na ki kynbat dawai ka sorkar kan nang pynkhlaiñ shuh shuh ïa ka kam rep kynbat dawai bad thaw ki lad ki lynti ban pynïaid ïew ïa ki kynbat dawai sha kiwei pat ki jylla, kiba la kham kiew ha ka jingnang jingstad bad kiba don ïa ki karkhana shna dawai ba bun jait. Lada la lah ban leh kumta ka ïoh ka kot jong ka jylla kan kiew bad ki paitbah kin kiew ha ka kmai kajih bad ka ïoh ka kot.
