Shillong, Naiwieng 27 : Ka ïing Bishar High Court jongka jylla ha ka sngi Balang, kala pynwai noh ïa ka Public Interest Litigation (PIL) da kaba bthah ïa ka Sorkar Jylla ban shim khia bha hapoh ka por kaba biang ban maramot ïa ka surok Mawphlang-Balat.
Ka ïing Bisharkala bthah ruh ïa u nongmudui ba un ïai shah khyndiat bad ap ïa ka Sorkar Jylla ba kan shim ïa ka jingkitkhlieh haba ban jur ba kam kwah ban tuklar ïa ki kam ba man ka sngi jong ka Sorkar lait noh satang lada don ka jingpulom kaba khraw ha ka jingtreikam.
Ka PIL kaba la mudui da u Baniarap Snaitang ka ïadei bad ka jingmaramot bad shna pynkhlaiñ ïa ka surok Mawphlang-Balat. La kubur ba ka jingmaramot ba la sdang da ka Sorkar Jylla bad ka dang ïai bteng. Ka jingsngew khia jong u nongmudui ka long ba ka bynta jong ka surok na Phlangwanbroi sha Khliehriat bad na Pomblang sha Laitumsaw ym shym la maramot satia bad donkam ban hap khmih ïa kane.
Ha ka hukum bala pynmih hadien ba la bishar ïa ka mukotduma, ka ïing Bishar ba kynthup ïa u Chief Justice IP Mukerji bad Justice W Diengdoh kala ong “ Ka ïing Bishar kam ju kham tuklar ïa ki kam ba man ka sngi ha ka jingpynïaid kam jong ka Sorkar. Ka tuklar tang lada don ka jingbym lah treikam ki bor Sorkar, ka jingbym leh eiei na ki bor Sorkar kaba ktah ïa u paidbah ba donkam ïa ka jingtuklar jong ka Iing Bishar”. Ha kane ka kam, ka ïing Bishar kala ong ruh “Ngi shem ba ka Sorkar kala shim ïa ka bynta ban maramot ïa kane ka surok”.
Kala hukum, “U nongmudui u donkam ban ïai shah khyndiat bad ap ba kan leh eiei haba ïadei bad ka bynta jong ka surok hapdeng ka Phlangwanbroi sha Khliehriat bad Pomblang sha Laitumsaw”.
