Shwa ïa ka por ba buh la pyndep u contractor ïa ka kam, ai jingïaroh u Bah Prestone

Shillong, Nailar 31: U Symbud Myntri Rangbah ka jylla uba dei peit ïa ka tnad Public Work Department (PWD) u Bah Prestone Tynsong u la ai ka jingïaroh ïa ki ar ngut ki contractor kiba la lah ban pyndep ïa ka kam shwa ka por ba la buh da ka tnad.
Kane kadei ïa ka ophis ba thymmai jong u Executive Engineer bad jong u Assistant Executive Engineer, kaba don ha ka shnong Madanriting bad u Bah Prestone Tynsong mynta ka sngi Nyngkong u la plie paidbah ïa ka ha ka jingsakhi lang bad ki heh ophisar jong ka tnad PWD Road bad Building.
Ka mang tyngka na ka bynta kane ka ophis trei kam ba thymmai la mang ha ka jinglut kaba la kot T.21, 441, 000 klur bad ïa kane ka ophis la pyntrei da ka Kong Ibapynhun Kharmih bad u Bah Kitbok Warbah.
Ha kane ka sngi la sakhi lang da ki heh ophisar ka tnad PWD bad kumjuh ruh ki nongtrei nalor kiwei pat.Na kane ka ophis katkum ba la sakhi kala long kum kawei na ki jaka jngohkai pyrthei kaba iohi shai kdar ia u Lum Diengïei bad u Lum Shyllong.
Na ka liang u Bah Prestone haba kren u la pynpaw ba ïa kane ka ophis ba thymmai la buh ïa ka thong ban pyndep ha u bnai Kyllalyngkot jong u 2027, hynrei kane ka jinglah ban ban pyndep shwa ïa ka por kan long ka nuksa sha kiwei pat ki contractor.
Shuh shuh u Bah Prestone u la ïathuh ba mynta ba la plie ïa kane kin don ki Division jong ka tnad PWD kiba don hapoh ka sor Shillong yn rah noh sha kane ka jaka ba dang shu dep shna thymmai ban pyntyllun ïa ki kam.
Ka Bye Pass Division bad Sub Division hap ban pynkynriah noh sha kane ka jaka bad ïa ka Sub Division jong ka Building ruh hap rah noh shane kumjuh ruh ki Mechanical Division bad Sub Division ki ban rah noh shane, ong u Bah Prestone.