Nongstoiñ, Nailar 31: Ki runar ki bym lah ban tip ki dei ki ei, ki la khang dusmon ïa ka dukan kaba don hajan ka Kshaid Weinia, kaba dei kawei na ki jaka jngohkai ha ka thain Nongkhnum.Kane ka jingjia la antad ba ka la jia ha ka miet shiteng synñia jong ka 30 tarik Nailar.
Ki pulit ki la ïathuh ba kane ka dukan ka dei jong u bah Spailin Lyngkhoi bad ka kong Balinda Ïawren.Kine ki trai ki ju sah man ka sngi ha katei ka dukan, hynrei ha ki sngi saitjaiñ, ki ju leit phai sha la shnong.
Ki pulit ki ïathuh ba ha ka 29 tarik Nailar, kine ki shikurim ki la mih na katei ka dukan ha ka por janmiet, pynban ha ka sngi ba bud jong ka Robibar, ynda ki la wan phai sha dukan ha ka por 5:30 baje mynstep, ki la kyndit ban lap ba ka dukan ka la pluh bad ka ding ka dang ing.
Ki ïathuh ba ka ding ka la bam duh lut ïa baroh ki jingdon jingem ha katei ka dur kyntup ïa ki tiar bad ka pisa bad ong ba ka jingduhnong ka la kot kumba T.30 lak.Ym tang ba shah thang ka dukan, la pyntip ruh ba ki runar ki la rah lut wat ïa ki syiar kiba ki ri ha kane ka jaka. Ki pulit ki la register case halor kane ka jingjia bad ka jingtohkit ka la ïaid shakhmat.
