Ka dei tang ka khubor hamsaïa, don kiba thmu ban wanrah ïa ka jingkulmar hapoh ka party UDP: Titos

Shillong, Nailar 31: Ka United Democratic Party (UDP) ha ka sngi Nyngkong ka la kyntait ïa ki khubor ba la mih ba khyndai ngut ki MLA jong ka ki dang ïakren ban pynïasoh sha ka Bharatiya Janata Party (BJP), da kaba kdew ba kitei ki khubor ki dei ki khubor hamsaia kiba thmu ban wanrah ïa ka jingkulmar hapoh ka party.
U General Secretary ka UDP u Bah Titosstarwell Chyne u la ong ba kane ka khubor hamsaïa ka la mih hadien ba ki katto katne ki MLA ka UDP ki la ïakynduh ïa u Myntri kam pohiing ka sorkar pdeng u Amit Shah ban ïakren ïa ki mat kiba ïadei bad ka Jylla Meghalaya.
U la pynshai ba ka jingïalang ka long ban rah ïa ki mat kiba kongsan kiba ïadei bad ka jingmyntoi jong ka Jylla, kynthup ïa ka FCRA Amendment, ka jingkhang tih dewiong, ka Meghalaya Residents Safety and Security Act (MRSSA), ka Inner Line Permit (ILP), ka mat Them Metor bad ka jingker ïa ki khappud.
Katkum u bah Chyne, ka UDP ka la pyrshah ïa ka FCRA Amendment bad ka la pan por ban eksamin ïa kane ka kam da ka Joint Parliamentary Committee (JPC).U la ong ruh ba ka jingkhang tih dewiong ka la ktah ïa ki nongtih dewiong kiba rit, katba ka MRSSA watla la mynjur da ka Sorkar Jylla hynrei ka dang sahkut ha ka Union Home Ministry.
U Bah Chyne u la ong ba ki don ki briew kiba la batai bakla ïa ka jingiakynduh bad ki nongialam ka BJP bad ki la pyndonkam ban pynsaphriang ïa ki khubor hamsaia ba ki MLA ka UDP ki thmu ban pyniasoh sha ka BJP.
U la ong ba hadien la pynlong ïa ka jingialang jong ka UDP Parliamentary Party, ha kaba la jan baroh ki MLA ka party ki la don lang bad kren shai ba kam don kano kano ka jingthmu ban mih noh na ka UDP lane ban pyniasoh sha ka BJP.
Haba ïa dei bad ki khubor ba la mih ba u president ka UDP u Bah Metbah Lyngdoh u la leit sha Delhi, u Bah Chyne u la ong ba ka khubor ka long kaba bakla.U la pynpaw ba u bah Lyngdoh u la leit sha ka jingialang ha Khliehriat ryngkat u bah Lahkmen Rymbui bad u Bah Kyrmen Shylla bad hadien u la wanphai noh sha la ïing hadien ba u la sah kut na ka jingdheng kali ha Mawryngkneng.
U bah Chyne u la kam ba ki lah ban don ki jingeh hapoh ka seng hynrei u la ong ba ym dei ban pyndonkam bakla ïa kine ban wanrah ïa ka jingkulmar shuh shuh.
U la kyrpad ïa ki nongthoh khubor bad ki nongpyndonkam ïa ki social media ba ki dei ban pynshisha ïa ki jingtip shwa ban pynsaphriang ïa kum kine ki khubor.U la ong ba, kumba ka long mynta, baroh ki MLA ka UDP ki dang ïai bteng ban sah bad ka party.
“Ka politik kam lah ban don ka jingkut kaba pura, bad ngim lah ban iathuh lypa ïa ka lawei, hynrei kumba long mynta ka sngi, baroh ki MLA ki don bad ka UDP”, la ong u bah Chyne.