Nongpoh, Naiwieng 24: Ha ka sngi ba u Bah Bipul Thangkhiew, President ba rangbah ka RBYF, u la leit ban pynskhem ïa ki nongkitkam ba pura jong ka RBYF Western Zone, u la kyntu ïa ki nongkitkam ba thymmai jong katei ka thain, ba ki dei ban shimkhia halor ka rukom treikam ka Patharkhmah Civil Sub-Division, khnang ba kan long ka jingmyntoi ïa ki paidbah jong katei ka thain Ri Bhoi Sepngi hi baroh kawei.
Nalor kaba u kyntu ïa kitei ki nongkitkam ba thymmai, ba ki dei ban shimkhia bad buddien bha halor ka Patharkhmah Civil Sub-Division, u Bah Bipul Thangkhiew, u la kyntu ruh ïa ki ba ki dei ban trei na bynta ban wanrah ïa ka bha ka miat ha ki shnong ki thaw bad ha katei ka thain hi baroh kawei, kata ka long ba rat dyngkhong ïa ki kam sniew kiba la sdang ban kynrei ha katei ka thain.
U Bah Thangkhiew, u la kyntu ïa kitei ki nongkitkam ba thymmai, ba ki dei ban ïatreilang bad ki nongïalam shnong, la ka long haba ïadei bad ki kam ha ka roi ka par bad kumjuh ruh ban wanrah ïa ka shnongsuk shongsain ha ki shnong ki thaw kiba don ha Ri Bhoi Sepngi, kaba dei ruh ka thain kaba bun ki shnong ki thaw ki don ha khappud bad ka jylla Assam.
Haba pynskhem ïa ki nongkitkam ba thymmai ka RBYF Western Zone, nalor u President ba rangbah, la sakhi da ka jingdon u Bah RJ Thangkhiew, Political Secretary ka RBYF Sengkmie, u Bah Elvis Kharbani, u Bah Phang Kylla lem bad kiwei.
Ki nongkitkam ba thymmai ka RBYF Western Zone, ki kynthup ïa u Bah Rishan Nongtri kum u President, u samla Tony Lyngdoh kum u General Secretary lem bad kiwei pat ki dkhot hapoh jong katei ka Zone.
