Kylla lyngdang ka trok hapdeng surok ha Umran Dairy, krad u nongñiah na ka jaka jia aksiden, lait thaw ka scooty bad kali

Nongpoh, Risaw 02: Kawei ka truck kaba kit ïa ki mar jong ki company cement ka la kylla lyngdang hapdeng surok bah haka shnong Umran Dairy, Ri-Bhoi District, ha ka sngi Thohdieng, kaba la pynthud shipor ïaka leit ka wan ki kali.
Kane ka jingjia ka la jia ha ka por kumba 3:00 baje janmiet, ha kaba ka trok kaba don ïa u registration number AS 01 NC 8537 ka la kylla lyndang hapdeng ka surok.
Katkum ka jingtip ba la ïoh, kane ka trok ka dei kaba wan na ka thaiñ Guwahati bad ka kit ïa ki byrni cement jong ka Taj Cement bad Black Tiger Cement, bad ka dang thmu ban leit pynpoi ïa ki mar sha ka company kaba don ha Lumshnong.
La ïathuh ba haba ka trok ka poi ha katei ka bynta jong ka shnong Umran, u draibar uba ñiah ïa ka trok um shym la lah shuh ban tehlakam ïa ka, kaba la pynlong ïa ka ban kylla lyngdang hapdeng ka surok.
Ha katei ka jingjia, kawei ka scooty bad kawei ka kali ki la lait salit na ka jingshah tynrah bad shah ban ha katei ka trok. Tang hadien katei ka jingjia u nongñiah katei ka trok u la her krad na katei ka jaka bad haduh mynta ym pat shym la lapdien ïa u.
Ki pulit jong ka Umsning Police Station ki la poi sha katei ka jaka ban pynlong ïa ka jingtohkit bad pynkynriah noh ïa katei ka trok na katei ka jaka ban lait naka dheng kali.