Ailad biang ka FKJGP Baridua Circle ïa ka Megha Food ban treikam hadien ba la pynkhuid ïa ka jingsma iwtung

Nongpoh, Risaw 20: Ka Federation of Khasi Jaiñtia and Garo People (FKJGP), Baridua Circle, ka la ailad biang ïa ka karkhana pynmih jingbam masi, ka Megha Food, kaba don ha Baridua, Ri-Bhoi District, ban bteng ïa ka jingtreikam jong ka, hadien ba la pynbeit ïa ki jingeh kiba ïadei bad ka jingsma iwtung kaba la mih na katei ka karkhana.
Ïa katei ka karkhana la khang tala noh ha ka taïew ba la dep da ki nongïalam ka FKJGP Baridua Circle, hadien ba ki la ïoh bun tylli ki jingujor na ki paidbah nongshong shnong halor ka jingsma kaba la ktah ïa ka jingim ba man ka sngi jong ki. Nalor kata, ka seng ka la pynpaw ruh ïa ka jingdonkam ban pynbiang ïa ki kot ki sla kiba donkam, kynthup ïa ka No Objection Certificate (NOC) na ka Dorbar Shnong Baridua.
Ha kaba ïadei bad kane, u Bah Denis Nongrum, President ka FKJGP Baridua Circle, ryngkat u Bah Allan D. Sohpdang, General Secretary, bad ki dkhot jong ka seng, ki la leit ban khang tala ïa katei ka karkhana bad bat ïa u shabi haduh ba la pynbeit ïa ki jingeh.
Naka liang u Bah Denis Nongrum u la ong ba ka seng ka la shim ïa kane ka sienjam namar ka jingbun ki jingujor na ki paidbah kiba la sngewkhia halor ka jingsma iwtung kaba mih na katei ka karkhana.
U la ong ba hadien ba la pynbiang ïa ki kot ki sla, kynthup ïa ka NOC na ka shnong, bad hadien ba la weng ïa ka jingeh kaba ïadei bad ka jingsma, ka seng ka la rai ban aiti biang ïa u shabi bad ailad ïa ka karkhana ban bteng ïa ka jingtreikam jong ka.
Hynrei, u la maham ba kane ka jingai lad kam mut ba ka seng kan sngap jar lada ka karkhana ka pynmih biang ïa ka jingsma iwtung. U la pynpaw ba lada ki paidbah ki dang ud ne ujor halor kane ka jingeh, ka seng kan shim biang ïa ki sienjam kiba donkam.
Ha kaba kut, ka FKJGP Baridua Circle ka la kyntu ïa ki paidbah nongshong shnong ban pyntip sha ka seng lada ki lap ba ka karkhana ka dang pynmih ïa ka jingsma.