Kyntu ki arseng na ka FFC ban ym pdiang ïa ka Public Hearing thok ka Shree Cement

Jowai, Risaw 20: Ka seng Khasi Jaiñtia Youth & Student Union (KJYSU) bad ka Indigenous Biodiversity & Social Welfare Organisation (IBSWO), ki la pynpaw ïa ka jingsngewbitar kaba khraw bad ka jingkyntait kaba tyngeh halor ka jingthmu ban ai jingbit ïa ka Public Hearing kaba la long ha ka 31.07.2026 na ka bynta ka Lum Syrman Limestone Block-A jong ka Shree Cement Ltd, East Jaiñtia Hills District.
Ki ar seng ki la pynpaw ba ka MSPCB ha ka shithi jong ka ha ka 14.10.2026 ka la ong ba kam dei ma ka kaba ai ïa ka Environmental Clearance (EC), hynrei ka la dep phah ïa ka file sha ka office jong ka SEIAA, Shillong.
Ki nongïalam ka KJYSU bad IBSWO, ki la kyntu jur ïa ka Fact Finding Committee bad ïa ka SEIAA, ban kim dei ban ai jingbit ïa kane ka Public Hearing thok, namar ka Public Hearing kaba long haka 31.07.2026 kam dei ka Public Hearing kaba hok. Bun ki trai shnong kiba pyrshah kim shym ïoh lad ban kren, ki paidbah ki la shah pyntieng bad ki kot ki sla la thoh da ka company hi. Kane kam long kat kum ka EIA Notification 2006.
Shuh shuh kila pynpaw da kaba ong ba ka jaka ha Lum Syrman kam dei ka jaka khaïi. Ka dei ka jaka pyllang um, ka jaka rieh tngen jong ki mrad, ka jaka rep jong ki longshuwa manshuwa. Lada ka Shree Cement ka tih ïa u ne u Lum, ka East Jaiñtia kan kylla Sahara ne ka ri shyiap, ka Wah Lukha bad ka Wah Myntang kin rngad syndon, da kaba pynpaw ba kim hun ne ym lah ban pdiang ïa kane ka project.
Ki la ong ruh ba lada ka Fact Finding Committee (FFC) ka nud ban ai jingbit ïa kane ka Public Hearing, kin pynlong ïa ka jingïakhih kaba heh ha baroh ka East bad West Jaiñtia. “Ngin khang lynti ïa ki kali jong ka Shree Cement ban rung sha Lum Syrman. Ngin leit sha ka NGT, Kolkata bad sha High Court ban ker ïa ka EC”.
“Ka jingwan jong ki Company kiba heh kum ka Topcem, Star Cement, Dalmia bad mynta ka Shree Cement ka la pynjot ïa ka Ri lum Jaiñtia. Ki kamai daki klur na ki lum ki them jong ngi, hynrei ki khun samla jong ngi ki dang sah khlem kam khlem jam, ki skul ki dang thut, ki lynti ki dang sniew.
Ki nongshong shnong jong ka Elaka Nongkhlieh da kila dep ai jingujor sha ka Fact Finding Committee, ban nym ai jingbit ïa kane ka project, te ngi ki ar seng ngi kyrshan pura ïa kane ka jingdawa jong ki”.
Ki la ong ruh hato ka Fact Finding Committee kan ïeng bad ki paidbah ne bad ki heh spah? Ngi kwah ka jubab kaba shai naka Fact Finding Committee. Kam dei ban ai jingbit ne ban pass ne ai jingbit ïaka. Ïa kane ka kyrwoh pa phah da u D. Shullet General Secretary KJYSU bad u G Lakiang President IBSWO.