Pynkhreh ka VPP ban ïasnohktilang bad ki longkmie ka Laban ban pyrshah ïa ka Ropeway Project

Shillong, Risaw 20: Ka Voice of the People Party ka la maham ba kan ïasnohkti lang ha kane ka jingïakhih ban pyrshah ïa ka Shyllong Peak projek Ropeway Shillong ba la thmu lada ka sorkar kam lah ban jubab ïa ka jingai por ne ultimatum kaba 10 sngi kaba la pynmih da ka Joint Action Committee kaba la ïalam da ki longkmie ka Riat Laban Dorbar Pyllun.
U president ka VPP u Bah Ardent Miller Basaiawmoit u la kynnoh ba ka sorkar ka la ïalam bakla ïa ki paidbah da kaba kheiñ ïa ka jingïasyllok bad ki katto katne ngut ki nongïalam shnong kum ka jingpynsngew paidbah ne ka public hearing. U la ong ba ka projek halor u lum Shyllong ka buh jingma ïa ka mariang kaba sniew jong ka thaiñ, ki jaka kyntang bad ki tyllong um kiba kongsan.
Haba kren sha ki nongthoh khubor, u Basaiawmoit u la ong ba ka seng ka ïeng ryngkat bad ki kynthei kiba ïakhih bad ka seng ka dang peitngor bha ïa ka jingleh jong ka sorkar. U la ong ba ki kynthei ki la shim ïa ka nongrim kaba skhem bad kin nym kynran dien, bad ba ka VPP ka la pynkhreh ban ïasoh bad ki lada ka sorkar ka pyrshang ban pynduhjait ïa ka jingiakhih kaba shong nongrim jong ki seng longkmie ka Riat Laban Dorbar Pyllun.
“Ka sorkar kam dei ban pynbor ïa ka VPP ban mih sha surok ryngkat bad ki nongshong shnong ka Riat Laban Dorbar Pyllun”, u la ong da kaba kyntu ïa ki bor ba dei peit ban burom ïa ka jingpyrshah paidbah.
U la buh jingkylli ïa ka jingkynnoh ba la pynlong ïa ka jingïasyllok paidbah, da kaba kdew ba bun ki nongshong shnong jong ka Riat Laban Dorbar Pyllun kim tip ïa ka jingïalang jong u snem 2022 kaba la kdew da ka sorkar. Ïa ki jingïakren bad katto katne ngut ki nongïalam, u la kynnoh, la pynleit noh kum ka jingbishar paidbah.
U Bah Basaiawmoit u la ong ba ka VPP ka la ju pynpaw ïa ki jingeh halor ka jingsumar ïa ka mariang bad ka jingdonkam ban ïada ïa ka Shillong Peak kum ka jaka lum kaba don um kaba pynneh pynsah ïa ki wah bad ki tyllong um kiba shakri bad ai jingmyntoi ïa ka sor bad ki shnong ba marjan. U la buh jingkylli ïa ka jingdonkam jong ka lynti ïaid ka Ropeway, da kaba kynthoh ba ka jingitynnad jong ka mariang bad ka jingmut jong ka kolshor jong u lum ka la biang ban khring ïa ki nongjngohkai pyrthei khlem da don ki jingtei ba kham heh.
Da kaba kyntait ïa ka jingkynthoh ba katei ka projek kan thaw kam thaw jam, u la batai ïa ka kum ka jingpyrshang ban pynphai ïa ka jingpyrkhat na ki jingeh jong ki paidbah. U la ong ba ka sorkar ka dei ban pyrkhat ban pynkynriah noh ïa ka projek lada kiba bun ki nongshong shnong ki pyrshah, da kaba bynrap ba ym lah ban pynbor ïa ka roi ka par pyrshah ïa ka jingkwah jong ki paidbah. Haba shim ïa ka jingkynthoh pyrshah ïa ka sorkar MDA, u la kynnoh ba ka la leh beiñ bunsien ban jubab ïa ki jingud jingnam jong ki paidbah lymda ki briew ki mih sha surok, da kaba kdew ïa ka jingïakhih jong ki nonghikai, ki nongïasaid aiñ, ki nongri jingri bad ki nongrep.
Kumta u la ong ba ka VPP kam banse ban mih sha surok lada ka sorkar kam sngap ïa ki jingdawa kiba shnong nongrim jong ki nongshong shnong jong ka jylla bad khamtam ïa ki longkmie kiba ïakhih na ka bynta ka bha ka miat jong baroh ki nongshong shnong ym tang na ka bynta jong kiba sah ha Laban Pylun.
Ïa kane u nongïalam ka VPP u la ïathuh ha ka prokram ba rung dkhot u Bah George Sunn sha ka Party na Mawphlang Constituency ha ka sngi Nyngkong ha ryngkat ki spah ngut ki nongkyrshan da kaba ong ba kane ka seng ka la mih pli na ka bynta jong ki jingeh jong ki paidbah kiba ïa kynduh mynta ïa ki jingeh ha baroh ki liang bad u la pynpaw ruh ba ka jingrung jong u sha ka VPP kam dei eh tang na ka bynta ban ïoh ïa ka tiket hynrei ban pynkhlaiñ ïa ka seng bad ka jingai jingtiket ka shong ha ka jingpynïaid bad jingstad jong ki nongïalam ka seng bad lada ka ai ïano ïano ruh u long uba la kloi ban trei shitom ban pynjop donburom ïa u kyrtong ba la sei da ka seng.