Shiteng dorjon pynbam ka Umtasor ïaka Umling ban rah ïaka nam lahduh ha ka Ri-Bhoi League ka RBDSA

Nongpoh, Risaw 20: Hadien ka jingïaid shaphrang jong ka lympung ïalehkai phutbol Ri-Bhoi League 3rd Division bala pynlong da ka Ri-Bhoi District Sports Association (RBDSA), katei ka lympung kala poi noh sha kaba kut mynta ka sngi hadien ka jingïakhun phainal hapdeng ka Umtasor Mawdkhar pyrshah ïaka Umling SC ha madan Umbuda Artificial Turf.
Ïa katei ka lympung la wan ban pynhap pyrda noh da u president rangbah ka Ri-Bhoi Youth Federation RBYF u Bah Bipul Thankhiew kum u kongsan, lem bad u President ka Khasi Student Union, North Khasi Hills District u Bah Ferdynald Kharkamni kum u symbud kongsan, haka jingdonlang u President ka RBDSA Bah R.B Shadap, Bah Pullstar Nongrum Working President, Bah Dipshon Ryntathiang Secretary lem bad kiwei kiwei ki riew rangbah ka thaiñ.
Haba phai sha ka jingïakhun phainal ha kane ka sngi hapdeng ka Umtasor pyrshah ïaka Umling ban ïaknieh ïaka nam lahduh, ka jingïakhun kala long kaba itynnad bad shongshit naduh ka kylla step, namar ka jingtbit ki rang ïalehkai ka Umtasor kiba la lah ban pynkhih nyngkong ïaka jar ban lamkhmat da 2-0 kol.
Haba phai sha ka kylla miet, ki rang ïalehkai ka Umling SC kim shym la lah ban khanglad ïaki rang thep kol ka Umtasor namar ka jingtbit ïalehkai jong ki bad ka Umtasor ka la ioh ban pynkhih biang ïaka jar haduh 4 sien, kaba la pynlong syndon ïaka Umtasor Mawdkhar ban pynliem noh ïaka Umling SC da 6-0 kol.
Ka Umtasor Mawdkhar kum ka laduh jong katei ka lympung ka la ioh ban rah ïaka song pisa kaba T.40,000/- hajar lem bad ka trophy, katba ka Umling Sports Club kaba la rem noh haka jingïakhun phainal ka la ioh ban rah ïaka song pisa kaba 20,000 hajar tyngka lem bad ka trophy, nalor kiwei kiwei ki khusnam shimet.