Nongpoh, Naiwieng 09 : Ki heprit na ka shnong Thad bad Kyrdem Kulai 6 Kilo ki la shim ïa ka sienjam kaba khraw ban mih shakhmat bad leit kynduh markhmat ïa u Deputy Commissioner ka Ri-Bhoi District, ban pynsngew ïa ki jingeh bad ki mat kiba ktah ïa ka jingshngaiñ jong ki hapoh ki shnong jong ki.
Kine ki khynnah ki dei ki dkhot jong ka Children’s Club na ka shnong Thad bad Children’s Club Kyrdem Kulai 6 Kilo, kiba la leit ban pynsngew kyrpang halor ka jingbym biang ki jingker u transformer uba don hapoh shnong Thad, kaba lah ban wanrah ïa ka jingma bad jingmynsaw, khamtam ïa ki khynnah rit. Ki la pynsngew ruh ïa ka jingbym shngaiñ jong ka lynti leit tong umdih kaba don hapoh ka shnong Kyrdem Kulai 6 Kilo.
Ha kane ka jingleit ïakynduh ïa u DC ka Ri-Bhoi, la ïalam ïa kine ki khynnah da ka Kong Balakyntiew Umbah, President ka Ri-Bhoi Area Welfare Association, ryngkat ka jingïadonlang jong ka Heprit Meba-Ai-Kyrpang Makdoh, President ka Children’s Club Shnong Thad, ka Heprit Lashemhun K. Rangtong, Treasurer, ka Heprit Lapynhun Ïakai, Secretary ka Children’s Club Kyrdem Kulai 6 Kilo, bad ka Heprit Naphishisha Mawlong, President ka Children’s Club Kyrdem Kulai 6 Kilo.
Haba kren sha ki lad pathai khubor, ka Heprit Lashemhun K. Rangtong bad ka Heprit Lapynhun Ïakai ki la pynpaw ïa ka jingsngewkmen kaba khraw ba ki la ïoh ïa ka kabu ban ïakynduh markhmat ïa u Deputy Commissioner ka Ri-Bhoi bad ban pynsngew beit ïa ki jingeh kiba ki ïakynduh ha ki shnong jong ki.
Ki la ïathuh ruh ba ha kane ka jingïakynduh, ki la kyrpad ïa u DC ban shimkhia ban pynbiang noh ïa ki jingker ïa u transformer, khnang ban lait na kino kino ki jingjia ba sngewsih, khamtam haba ki khynnah rit ki ju ïalehkai hapoh shnong. Nalor kata, ki la kyrpad ruh ban pynbiang da ki Solar Street Lights ha ka lynti leit tong umdih hapoh shnong Kyrdem Kulai 6 Kilo, khnang ba ka lynti kan long kaba shngaiñ bad kaba suk ban pyndonkam ïa ki khynnah kiba ju leit tong um na katei ka jaka.
Na ka liang jong u Deputy Commissioner ka Ri-Bhoi, u la pynpaw ïa ka jingsngewkmen ban ïakynduh ïa kine ki khynnah kiba la shim ïa ka sienjam ban mihkhmat ïa ki Children’s Club bad ban pynsngew ïa ki mat kiba donkam hapoh ki shnong jong ki, ha kaba u la kular ruh ban shimkhia bad peit bñiah ïa kitei ki jingeh ba la wanrah da kine ki khynnah.
