Dawa hiar shuki ka seng Congress ïa u CEC Gyanesh Kumar ha ka jingïaid paidbah ha Nongpoh

Nongpoh, Nailur 30: Ka Ri-Bhoi District Congress Committee (RBDCC) ryngkat bad ka Ri-Bhoi District Youth Congress mynta ka sngi ki la pynlong ïa ka jingïaid rally ha Nongpoh, da kaba dawa ïa ka jinghiar shuki mardor ïa u Chief Election Commissioner (CEC) ka ri India, u Gyanesh Kumar, halor ki kynnoh ba ka Special Intensive Revision (SIR) ka la pynmih ïa ka jingduh ïaka hok bad ki kyrteng jong bun ngut ki nongthep vote haka ri.
Ka rally ka la sdang na Indoor Stadium, Umlyngkdait, bad la pynklut pat ha Nongpoh Town Shopping Complex, ha kaba ki nongïalam bad dkhot ka Congress na ki district bad block bapher bapher, ryngkat ki nongkyrshan, ki la ïashim bynta.
Ha ka jingïalang, ki nongïashim bynta ki la pynpaw ïa ka jingpyrshah halor ka rukom pynbeit ïa ka thup nongthep vote lyngba ka SIR bad ban jur ïa ka jingdawa ban hiar shuki ïa u CEC bad ha kane ka sngi kum ka dak ka jingpynrem naka liang ki nongïalam ka seng Congress kila thang ruh ïaka tyngshop jong u Gyanesh Kumar ha phyllaw ka Nongpoh Town Shopping Complex.
Ha kane ka sngi la ïadonlang naduh u President ka RBDCC, Bah Cleophas Syiem, Working President Bah Klan Lyngdoh, President ka Ri-Bhoi District Youth Congress Samla Standwell Manih, Vice President ka Nongpoh Block Congress Committee Samla Antonio Lapang, ryngkat bad kiwei ki nongïalam bad dkhot ka party.
Haba kren ha kane ka sngi naka liang ki nongïalam ka seng Congress kila ong ba ka seng Congress ka iengskhem halor ka nongrim ka synshar khaddar kaba khuid, ba uwei pa uwei u nongshong shnong un ioh ban im laitluid bad kane ka jingïaid rally ka long ban pynsngew shaduh ki shkor u Narendra Modi ba un shimkhia ban kem mardor ïa une u briew, namar uwei pa uwei u nongshong shnong ka ri India u don ka hok ban thep vote hynrei mynta I kumba don mano re mano ba knieh ïa kane ka hok naki paidbah.