Khyndiat sngi mynshwa, ka la don ka jingthad madan jong kawei ka thei samla, kaba trei ha Bangalore, ïa ki para ri jong ka bad kane kam dei shuh ka sien kaba nyngkong, naba ha ki snem kiba mynshwa, ki dei ki bar jylla, kiba thad rong ïa u khun Khasi, hynrei ha kine ki sngi, ki la dei noh, da ki ïing ki sem, ki kur ki jait bad ki doh ki snam la jong hi ngim tip ïa ka daw, la ki dei ba ki leh hi, ne ki la long noh ki atiar jong kiwei pat.
Haba ïakren ïa kane ka mat, ka don kawei ka jingjia, kaba la ïathuh da uwei u rangbah, ïa une u nongthoh bad kata ka long, ba khyndiat snem mynshwa, ula lap ïa kawei ka samla lud, kaba sahkut ha kad Liengsuiñ Bangalore, namar ba kam tip satia ïa ka jaka, ba ka dei ban leit trei bad ynda ula kylli, ka ïathuh ba ka dei ban leit trei ha kawei ka hotel, ha kaba ka jingsiew ka dei T.10 hajar shibnai.
Katei ka jingshisha, ka la biang, ba ngin sngewthuh ba kumno ka thei samla kan mih na la ïing ban leit bylla sha Bangalore, na ka bynta ka tulop kaba shiphew hajar shibnai bad na katei ka tulop, tip, ka da ïoh ne em ban siew ïa la ka jong ka bai ïing bai sem, ka bai bam bad ban pynlang ïalade, ba kan ïoh wan phai sha la Ïing, ha ka por kaba donkam bad katei hi, ka la dei ka nuksa kaba shai bha, ban pyni, ba ka don ka jingbieit jong ki kmie ki kpa, lehse ba ki shah ïalam bakla ha ki khun, lane ba ka don ka jingshah pynbieit jong katei ka samla ha kiwei pat bad lada ban rah ïa ka samla na Shillong sha katei ka nongbah, kam don jingeh, kumta lei, sa ban phah kren video, kan don jingduhnong aïu te?
Ka sorkar jylla, dangshen, ka la pynmih ïa ka jingbthah ba kito kiba leit shabar, ki dei ban pynrung kyrteng ïalade ha ka bui (register), ba ki la buh kyrpang bad katei ka khynnah, ka dei ban don ha katei ka bui lem bad ki jingtip kiba biang shaphang jong ka bad kumjuh ïa kiba ha Ïing jong ka, namar ba haba don kum kine ki khep, ka dei ka kamram jong ka sorkar jylla, ban ai tiket shong rel ei ïa ka, ba kan wan phai sha la Ïing, ba kan shah sympat shi dieng ar dieng, ha la ka kmie, ha la u kpa, ha la ki hynmen lane ki kñi. Kam dei tang kata, haba ki khynnah, ki leit pynrung kyrteng ïalade, ka dei ruh ka kamram jong ka sorkar jylla, ba kan sngewthuh, ïa ka jingthmu jong ka jingleit jong ki, namar lada ki thynrang ïa ka 10 hajar ha Bangalore, kumta ki tnat sorkar, ki la dei ban pynrung kyrteng ïa ki, ha kano kano ka VEC, ba kin shim ïa ka wait, ka khoh bad u mohkhiew ban trei job card bad khlem pep, kin jin da la ïoh kamai kham heh, da kaba shong ha la shnong.
Lyngba kane ka jingjia, ka la dei ruh ïa ki kynhun sengbhalang, kiba don shnat sha ki nongbah bapher, lada dei ka KSU ne kiwei ki seng, ne ki kynhun niam ne ka sorkar jylla, ba kin buh noh ïa uwei u ophisar ba kyrpang, u ban wad jingtip, ïa ka leit ka wan, ka shong ka sah bad ka trei ka ktah jong ki khun samla jong ngi, namar ba haba ki don kum kine ki dak ki shin, la dei ban wad na tyllong ban ïoh jynrat syndon ïa ka jingsniew naduh dyngkhong.
