Nongpoh Risaw 16: Ka ophis u District Sports Officer, Ri Bhoi District, Nongpoh ha ka jingïasnohkti lang bad ka ophis U BDO Jirang mynta ka sngi ka la pynkut noh ïa ka lympung jong ki samla ban pyni ïa ka sap ka phong jong ki ïa kaba la tip kum ka “Block Level Chief Minister Youth Engagement Programme 2025” kaba nyngkong halor ka Phang “Empowered Youth, Empowered Meghalaya”, kaba 2 sngi bad ïa katei ka prokram la pynlong ha St. Peter Secondary School, Umkadhor kaba hap ha Jirang Block.
Ïa katei ka lympung ki samla kaba la pynlong hapoh Jirang Block la sdang hynnin ka sngi ka 15 tarik Risaw ha kaba la wan ban plie da u BDO ka Jirang Block u Dr. P Hajong ha ka jingdonlang u Bah Bobby L Nongbet, District Sports Officer, kong Rida Lyndem PTI ka ophis u DSO lem bad kiwei kiwei.
Ha kane ka prokram kaba ar sngi kynthih la sakhi ïa ki jingïakop bapher bapher kaba kynthup ïa ka jingiakop dro bad airong, ka jingïakop tem Guitar, ka jingïakop rwai bad shad tynrai, kyntip ktien, bad kiwei kiwei, ha kaba la wan ban shim bynta shitrhem daki khun samla kynthei bad shynrang na ka thaiñ Jirang bad napdeng kitei ki samla na ka liang ka ophis u DSO kan jied 68 ngut ki samla kiba kynsai tam ban leit ïa shim bynta pat sha ka District Level ban ïakop pyni sap pat bad kiwei kiwei ki Block na Ri Bhoi.
Ha kane ka sngi pynkut la wan ban pynhap pyrda noh da u myntri ka sorkar jylla, u Bah Sosthenes Sohtun uba dei ruh u MLA/MDC ka Jirang Constituency ha ka jingdonlang u C Awasthi SDO (Civil) Patharkhmah Civil Sub Division kum u symbud kongsan, u BDO ka Jirang Block Dr. P Hajong lem bad ki nongtrei na ka ophis u DSO, Jirang C&RD Block ki khynnah skul lem bad ki nonghikai.
Ha kaba kut pat jong katei ka lympung na ka liang ka ophis u DSO ki la sam ïa ki khusnam sha baroh ki nongjop ryngkat ka syrnot sha baroh kiba la wan ban ïa shim bynta ha katei ka lympung kaba arsngi kum ka jingai mynsiem halor ka jingshim bynta shirhem jong ki bad ban pynpaw pyrthei ïa ka sap ka phong kaba ki don.
