Jngoh ki nongthoh khubor ïa 2 tylli ki jaka pawnam ka Bengaluru, ka Vidhana Soudha bad IISc

Bengaluru, Risaw 16: Ka kynhun ki 14 ngut ki nongthoh khubor na Meghalaya bad Tripura kiba don mynta ha ka jingleit jngoh ïa ka Karnataka, hynnin ka sngi ki la leit jngoh ïa artylli ki jaka ba pawnam bha jong ka Bengaluru -ka Vidhana Soudha, ka jaka ba don ka ïingdorbar thaw aiñ jong ka Karnataka, bad ka Indian Institute of Science (IISc), ka jaka pule ba pawnam jong ka ri na ka bynta ka jingwad bniah ha ka science bad ka jingpule kaba kham halor.
La pynlong ban kyntiew ïa ka jingïatylli jong ka ri bad ban kyntiew ïa ka jingïasngewthuh hapdeng ki thaiñ, ka Press Tour ka plie lad ïa ki nongïashim bynta ban ïohi markhmat ïa ka jingriewspah jong ka Karnataka ha ka liang ka synshar khadar, ka saïan, bad ka kolshor.
Ha ka bynta kaba kongsan jong ka jingleit jngoh mynta ka sngi ka long ka jingleit jngoh ïa ka Vidhana Soudha, ka jaka ba donburom jong ka ïing dorbar thaw aiñ jong ka jylla Karnataka. Ïa ka kynhun la pdiang sngewbha da u Gyanshekhar, senior Parliamentary Guide, uba la ai ka jingbatai kaba shai shaphang ka kongsan jong kane ka jaka ha ka histori, ka jingtei bad ka kam shna aiñ.
“Namaskar bad nga pdiang sngewbha sha ka Vidhana Soudha – ym tang ka ïing sorkar, hynrei ka dak ba im jong ka mynsiem synshar paidbah bad ka pateng jong ka rukom tei jingtei jong ka Karnataka,” ong u Gyanshekhar.
U la ïathuh ba ïa ka Vidhana Soudha la pyrkhat bad tei hapoh ka jingïalam jong u Kengal Hanumanthaiah, Myntri Rangbah ka Mysore ha kata ka por, ban pynpaw ïa ki jingangnud jong ka India hadien ka jinglait luid na ka bynta ka jingsynshar hi dalade, ka burom bad ka jinglong nong India. Ïa u maw nongrim la buh da u Myntri Rangbahduh ka ri u Jawaharlal Nehru ha u snem 1951, bad ïa ka jingtei la pyndep ha u snem 1956.
La tei da kaba pyndonkam da ka granite ba la wanrah na kylleng ka Bengaluru, kane ka jingtei ka jrong haduh 150 phut, bad ka don saw mala bad kawei pat ka mala kaba don ha khrum bad ka heh palat 60 akar. Ka long kawei na ki ïing thaw aiñ ba heh tam ha ri India, bad ka pyni ïa ka jingkhleh lang jong ka jingtei Neo-Dravidian, Indo-Saracenic, bad ki jingtei temple barim jong ka ri India.
Ka central dome, kaba don ka dak jong ka ri – u Sing jong ka Ashoka, ka dei kaba lah ban ïohi na jngai, katba hakhmat pat ka don ïa ka jingthoh: “Ka Kam jong ka Sorkar ka dei ka Kam jong U Blei” – ka jingkren kaba pynpaw ïa ka jingkitkhlieh jong ka jingshakri paidbah.
La pyni ruh ïa ka kynhun ïa ka jinglong bad ka jingtreikam jong ka Ïingdorbar Thaw Aiñ bicameral jong ka Karnataka, kaba don hapoh ka Vidhana Soudha. Ka Ïing Dorbar Thaw Aiñ (Vidhana Sabha) ka dei ka ïingdorbar kaba kham hapoh, kaba kynthup ïa 224 ngut ki dkhot ba la jied (MLA). Ka don ka jingkitkhlieh ban thaw aiñ, ban mynjur ïa ka mang tyngka, bad ban buh jingbahkhlieh ïa ki nongpynïaid kam.
Ka Legislative Council (Vidhana Parishad) ka dei ka Ïing dorbar kaba halor, ka kynhun kaba pura kaba don 75 ngut ki dkhot, kaba la jied beit beit na ki konstitwensi bapher bapher kynthup ïa ki nonghikai, ki samla ba la pyndep ïa ka graduate bad ki bor synshar shnong. Ka long kum ka kamra ban bishar bniah bad ban ïatai bniah.
“Ki ar tylli ki Ïing dorbar ki pynthikna ïa ka jingpeit bniah bad ki jingryntih, ki pynïar ïa ka jinglong nongmihkhmat, bad ki pyni ïa ka jinglong rangbah jong ka synshar paidbah ha ka jylla,” la pynkut u Gyanshekhar.
Ha shuwa kane, ka kynhun ka la leit jngoh ïa ka Indian Institute of Science (IISc)-ka jaka pule kaba pawkhmat ha ka pyrthei ha ka pule puthi bad ka jingwad bniah halor ka saïan, kaba la seng ha u snem 1909 da ka jingïohi jngai jong u Jamsetji Tata, u trai kompeni bad ka jingkyrshan jong u Maharaja jong ka Mysore.
Ka Yashali na ka Tnad Communication ka la ai ka jingbatai kaba bniah bad la pyntip ruh ïa ki ba ka IISc ka la ju ïoh ïa ka kyrdan kum ka jaka pule ba nyngkong ha ka ri India ha ka National Institutional Ranking Framework (NIRF) da ka sorkar India, ka jingithuh kaba ka la bat la katto katne snem namar ka jingtbit jong ka ha ka jinghikai, jingwad bniah, jingsaiñdur thymmai bad ka jingktah ïa ka jingpule ha ka pyrthei.
Ki nongthoh khubor ki la leit jngoh ïa artylli ki jaka wad bniah kiba katkum ka juk mynta: ka Supercomputer Education and Research Centre (SERC) bad ka Centre for Brain Research (CBR) bad la ai jingtip shaphang ka bynta ba kongsan jong ka IISc ha kaba kyntiew ïa ka kyrdan jong ka India ha ka kam jong ki stad saïan ha ka pyrthei.
Ha SERC, ka kynhun ka la sakhi ïa ka PARAM Pravega, kawei na ki kor kompiwtor ba stet tam bad ba khlaiñ bor jong ka India, ba la shna hapoh ka ri, ba la pyntreikam hapoh ka National Supercomputing Mission (NSM).
Ka PARAM Pravega ka kyrshan ïa ki jingwad bniah kiba ha khlieh duh ha ka jingpynwandur ïa ka jinglong ka suiñbneng, ka artificial intelligence, ka jingstad saïan shaphang ki mar bapher bapher bad ki simulation ïa ki kam kiba ïadei bad ka suiñbneng.
Ki stad wad bniah ki la batai kumno ka supercomputer ka ïarap ïa ki jaka pule bad ki jaka treikam jong ka sorkar ban weng ïa ki jingeh ba bun ha ka liang ka saïan bad ka imlang sahlang.
La pynkynmaw ruh ïa ki nongthoh khubor ba ka IISc ka la pynmih ïa ki katto katne ki scientist ba pawnam jong ka ri India.
Katba ka jingleit jngoh ki nongthoh khubor ïa ka Karnataka ka dang bteng, ka kynhun mynta ka leit sha Mysuru, ha kaba kin sakhi ïa ki jingriewspah ka kolshor, ka pule puthi jong kane ka nongbah bad ki jaka treikam ba ïadei bad ki riewlum, kaba nang pynjylliew shuh shuh ïa ka jingsngewthuh jong ki shaphang ka jingnoh synñiang jong ka Karnataka sha ka roi ka par jong ka ri.