Ai noh da ka Niam Khasi Niamtre haba wan kiba lum khanasamari, ong ki nongïalam Sengkhasi Niamtre

Shillong, Jylliew 02: Ka Sengkhasi Sengkmie bad ka Niamtre ha ka sngi baar ki la buh noh da kawei ka kyrteng na ka bynta baroh ki khun Khasi Pnar kiba dang bat dang ksoh hapoh ka niam Khasi Niamtre hapoh ka ri Khasi Jaiñtia baroh kawei na ka bynta ban pynsuk ha ka por ka jingwan lum khanasamari kaba dang ïaid shakhmat mynta jong u snem 2027.
Haba kren sha ki lad pathai khubor u Vice President ka Seng Khasi Sengkmie u Rangbah P D Nongrum u la ong ba ha kane ka sngi na ka liang ka seng Khasi bad ka Niamtre la ïa mynjur lang ban buh noh da kawei ka kyrteng na ka bynta baroh ki Khasi pnar kiba dang ksoh hapoh ka niam tynrai khnang ban pynsuk ïa kiba wan lum khana samari na ki longïing jong kiba dang ksoh ha ka niam tynrai da kaba kin pynpaw beit noh ba ki dei na ka Niam Khasi Niamtre kumba long lem kiwei pat ki jait niam ha ka por ba wan lum samari.
U la ïathuh ba naduh mynshwa haba kylli shaphang ka niam la ong beit ba dei na ka niam tynrai kumta la pynngat lang bad kiwei ki niam rit paid ki bym ïoh jingithuh kumta da kaba ai da kane ka kyrteng kan ïarap ïa ki longïing ban pynpaw shaphang ka niam.
Haba pynshai shuh shuh halor kane na ka liang u Vice President ka Seng Khasi kmie u la ïathuh ba kane kadei ka rai halor ka mat ba la mynjur lang da ka kawei ka sur na ka bynta ka census 2027 yn ai noh da ka Niam Khasi Niamtre bad haba ki wan shim census ka long ba kin ai kyrteng noh da katei.
U la ïathuh ba ha ki por ba mynshwa haba wan lum census ïa ki bym dei Khristan la pynrung beit kum ki non Christian, kumta na ka liang ka Ministry of Home Affairs ka la bthah ba dei ban thoh beit kumba ong ki longïing ym lah ban thoh da kumwei pat, kumta la bthah ïa khun khasi pnar kiba dang bat dang ksoh ne ki ki khun u Hynñiewtrep Hynñiew Wasa ba kin shim khia halor kane ka Census 2027.
Haba kylli pat halor ka jingdon paid jong kiba dang ksoh ha ka niam tynrai ki la ïathuh ba malu mala ki la poi baroh 4 lak ngut bad da kane ka jingwan ban leh khanasamari kaba mynta ka kynti yn sa lah ban ïoh ïa ka jingkheiñ kaba paka bad kaba bniah.