Rai Meghalaya bad Assam ban bteng ka kam rep ha Lapangap bad ban pynneh ïa ka shongsuk

Jowai, Jylliew 2: Ka High Level meeting ba kynthup ïa ki nongmihkhmat na ka sain pyrthei, ki Heh Ophisar bad ki Pulit, bad nongmih khmat na ki District Council na ka Sorkar Meghalaya bad Assam, ki la pynlong mynta ka sngi ha Assam Police Camp ban ïa kren halor ki kam ba ïadei bad ka jingïakajia pud ha ka thain Lapangap.
Katkum ka kyrwoh khubor na ka ophis jong u Deputy Commissioner, West Jaintia Hills District, Jowai la pyntip ba ïa kane ka jingialang la pynlong kum ka jingpynbteng ïa ka sienjam bala shim ha ka kyrdan ba halor eh da u Myntri Rangbah ka Meghalaya, uba dang shen ula shong ïakren bad u Myntri Rangbah ka Assam da ka jingthmu ban wad ia ki lad ki lynti ba mynjur lang bad ba jai jai ban punbeit ia ki jingeh kiba mih ha ka thain.
Haba pynbud ïa kine ki jingiakren, la shim ïa ka rai ba kan don ka jingialang na baroh arliang kaba kynthup ïa ki nongialam sain pyrthei, ki heh Ophisar, ki nong mihkhmat ka thain ban pynsuk ha kaban shim ia ka rai ba mynjur lang.
Kiba mih khmat ïa ka Assam ki long u Dr. Tuliram Ronghang, MLA bad Chief Executive Member (CEM), Karbi Anglong Autonomous Council (KAAC); u Amarsing Tisso, Member of Parliament; u Ajay Kumar Tiwari, IAS, Additional Chief Secretary (Home & Political); u Surjya Rongphar, MLA bad Executive Member, KAAC; u Lunsing Teron, MLA bad Executive Member, KAAC; u Habbey Teron, MLA; u Niso Terangpi, MLA; u Avijit Kro, Deputy Speaker, KAAC; u Headsing Rongphar, Member of Autonomous Council, KAAC; ka Preeti Kumari, IAS, Deputy Commissioner, West Karbi Anglong; bad u Dinesh Kumar, IPS, Superintendent of Police, West Karbi Anglong.
Kiba mih khmat ïa ka Meghalaya ki long u Bah Sniawbhalang Dhar, Deputy Chief Minister; u Bah Frederick R. Kharkongor, IAS, Principal Secretary; u Bah Cyril V. Diengdoh, IAS, Commissioner & Secretary; u Bah Garod L.S.N. Dykes, IAS, Secretary; u Bah Thombor Shiwat, Chief Executive Member, Jaintia Hills Autonomous District Council (JHADC); u Abhinav Singh, IAS, Deputy Commissioner, West Jaintia Hills District; bad u Jagpal Singh Dhanoa, IPS, Superintendent of Police, West Jaintia Hills District.
Ha kane ka jingialang kila shim ia kine ki rai, “Ki nongshong shnong ka Lapangap kin ïai bteng ban leit rep kba ha ki jaka them jong u lum ba don ka jingiakajia”.
Ka rai kaba ar ka long ba ki nongshong shnong ka Tahpat kin ïai bteng ban rep ïa ki jingthung kat kum ka aion kum ka kait, sohtrun, sying bad kiwei kiwei ki jingthung halor u lum bad ki jaka ba sharing.
Ka rai b alai, Ka kam ba ïadei bad ka jingphiah ïa u pud ba shirta ha ka jaka ba don jingiakajia yn sa shong pyrkhat bad shim rai da ki committee kiba dei ha ka kyrdan jong ki Jylla.
Ka rai kaba saw, Baroh arliang mamla kin hap ban pynneh ïa ka jingsuk, ka suk ka sain bad kin kiar ban leh ïa kino kino ki kam kiba lah ban pynmih jingkulmar lane ktah ïa ka jinglong ka suk ka sain ba long mynta.
Lah ban kdew ba ka jingialang ba ha shuwa jong ki nongmih khmat na ki Shnong la pynlong ha ka 18 tarik Jymmang, 2026, kaba la pynbeit da u Deputy Commissioner bad Superintendent of Police, West Jaintia Hills District, kala sahkut khlem ka jinglah shim rai namar ki jingiapher ki jingsngew haba iadei bad ki jait rep kiban shah ha ka thain.
Ka jingialang ba mynta la pynlong kumka jingpynbud ïa ka jingiasngewthuh jingmut hapdeng ki ar Sorkar Jylla ban wanrah ïa ka lynti kaba ïa pdiang lang da baroh.
Ka rai kaba la shim mynta ka sngi ka pyni ïa ka jingkut jingmut jong baroh artylli ki Sorkar bad ki kynhun ba don bynta ha kaban pynneh ïa ka jingsuk, ïada ïa ka jingmyntoi ki trai shnong, bad pynbeit ïa ki jingeh ba sahteng lyngba ki jingiakren bad jingiatreilang.