Shillong, Jylliew 03: Da kaba khmih lynti ïa ka jingïakhun kaba jur, ka jingdie ïa ki tiket na ka bynta ka phainal jong ka lympung Meghalaya State League kaba 5 kan sdang naduh kane ka sngi Palei ha ka jaka die tiket ha SSA Stadium.
Ha kane ka sienjam kaba 5 ka Nongkseh SSCC bad ka Langsning FC ki la pynthikna ïa jaka ha ka phainal, ha kaba baroh arliang kin ïa aireng ban ïaknieh long lahduh jong ka phutbol ha Meghalaya. Da kaba rah ïa ka khusnam lahduh kan plie lad ruh ïa ki ban ïashim bynta ha ka I-League 3 jong ka All India Football Federation.
Ha kane ka sngi Palei ka jingdie tiket kan long naduh ka por 2 baje nohphai sngi haduh ka por 6 baje janmiet bad ha ka sngi ïalehkai, kata ha ka sngi Thohdieng, ka jaka die tiket kan plie naduh ka por 1 baje mynsngi. Ka jingïalehkai kan sdang ha ka por 6 baje janmiet hapoh ka jingshai jong ki floodlight. Ka dor jong ki tiket ka sdang naduh T.100 haduh T.300.
Baroh ar tylli ki jingïalehkai Semi final ha ka taïew ba ladep ha SSA Stadium, ka la long kaba shongshit, kiba la long ha khmat ki nongpeitkai kiba bun bha kiba la kyrshan shitrhem ïa ki saw tylli ki kynhun. ïa ka phainal yn pyni live ruh ha ka app Hello Meghalaya.
Ki nongpynïaid ki la kyrpad ïa ki paid nongkyrshan ba kim dei ban rah ïa ki bilor um, ki tiar kiba shyrkhei, ki tiar pynmynsaw, lane kino kino ki tiar kiba beaiñ shapoh ka Stadium. La khang pyrshah ruh ban dih duma bad dih kyiad hapoh ka jaka shong.
Kane ka sienjam jong ka MSL, ba la pynlong da ka Meghalaya Football Association ryngkat ka jingïatreilang bad ka Tnad Directorate of Sports and Youth Affairs, kadei kaba heh tam haduh mynta, bad hadien 130 tylli ki jingïalehkai naduh ba la sdang ka MSL 5 ha u bnai ïaïong, ka Nongkseh bad ka Langsning ki la thrang ban wanrah ïa ka jingïalehkai kaba kham kyrpang bad ban kurup ïa ka nam lahduh.
