Thep kput ka Lajong haduh 9 kol ïa ka Sei La Sap; Jop ka Mawlai ïa ka Mawpdang
Shillong, Naiwieng 15: Ka Shillong Lajong FC ka la khur ïa ka jingjop kaba bun kol tam ha ka SSA Champions Cup da kaba pynjemkhnap haduh 9-0 kol ïa ka Sei La Sap FCC ha ka jingïakhun ha ka sngi Saitjaiñ ba ladep ha SSA Stadium.
U Lalmuansanga (4′, 50′, 51′) u la ïoh ban thep ïa ka hat-trick kaba nyngkong jong ka samoi, katba u Colinsalmon Lyngdoh (34′), u Iohborlang L Lyngkhoi (42′), u Emanbha Marbaniang (46′), u Deibormame Tongper (81′) bad u Fridison Wanniang (83′) ki la bynrap lem mar shi kol na ka bynta ka kynhun. Ka la don ruh ka kol ba la kum thep hi da u rangïalehkai ka liang pyrshah ha ka minit kaba 12.
Ka Mawlai SC ruh ka la ïoh mad ïa ka jingjop ha ka jingïalehkai kaba bud jong ka Group A, ha kaba ka la pynliem noh da 3-1 kol ïa ka Mawpdang SC. U Wadshwa Latoo (13′, 52′) u la pynkhihjar ar sien katba u Lovingstar Suting (90’+5) u la thep ïa ka kol kaba lai bad kaba khatduh na ka bynta ka Mawlai. Ka shi kol jong ka Mawpdang la thep da u Donlad Diengdoh (78′).
Baroh ar tylli ki jingïalehkai ka long hapdeng ki kynhun na ka Shillong Premier League (ka Mawlai kaba dei ka lahduh, ka Lajong runners-up) pyrshah ïa ki kynhun Fourth Division (ka Mawpdang kaba dei ka lahduh, ka Sei La Sap runners-up), bad kumba ju long ka jingïakhun kan long kaba jwat na ka bynta ki klob ba kham hapoh kyrdan.
Ka jingïapher ha ka jingkhlaiñ ka la paw shai hadien ba ka Sei La Sap ka la shah thep saw kol tang ha ka kylla step bad sa san kol ha ka kylla miet, ha kaba u Lalmuansanga u la pynkhihjar nyngkong ha ka minit kaba 4, bad nangta u la pyndep ïa ka hat trick jong u ha ka kylla miet da kaba thep ar tylli ki kol hapoh shi minit.
Kane ka jingjop kaba da 9-0 kol ka la kham khraw ban ïa ka jingjop da 8-0 kol ba ka Lajong ka la mad pyrshah ïa ka Mawlynrei ha ka Champions Cup 2025, kaba la long mynshwa ka rekod jingjop kaba bun kol tam ha kane ka lympung.
Ha ka jingïalehkai kaba bud, ka Mawlai ka la pynskhem ïa ka jingïalam jong ka ha ka Group A da kaba jop ïa ka jingïalehkai pyrshah ïa ka Mawpdang. Ki la pynkhihjar nyngkong lyngba u Wadshwa uba la pyndei tiak da ka khlieh ïa ka bol bol pashat jong u Damanbhalang Chyne.
U Wadshwa u la thep kol biang sa shi sien ha ka minit kaba 52 ban pynjlan ar shah ïa ka kol lamkhmat jong ka kynhun. Ka Mawpdang ka la pynkhie-im shipor ïa ka jingïakhun da kaba pynphai kawei lyngba u Donlad hynrei u Lovingstar ka Mawlai u la pynskhem ïa ka jingjop da kaba thep ïa ka kol ba lai ha ki minit pynjlan shuwa ban kut ka jingïalehkai.
Hadien ar tylli ki jingïalehkai, ka Mawlai ka lamkhmat ïa ka Group A da 6 point, katba ka Mawpat SC ka bud nadien ha ka kyrdan ba ar da 4 point. Ha ka Group B ka Lajong ruh ka la khur 6 point, katba ki don lai tylli ki kynhun kiba ïaryngkat point da mar 3 – ka Mawkhar SC, ka Sohryngkham SC bad ka Sei La Sap.
Ha kane ka sngi Nyngkong kan don ka jingïakhun jong ka Group A hapdeng ka Mawpat pyrshah ïa ka Lamlynti FC ha ka por 11 baje mynstep, hadien kane ka Mawkhar kan aireng pyrshah ïa ka Sei La Sap ha ka por 2:30 baje nohphai sngi ha ka Group B.