La ïohi ba la nang tuid kiba kyrshan JAC, ki Expert ban tohkit Lum Shyllong kan bha lada ki dei kiba na jylla bad tip ïa ka phang

0

Ka jingpyrshah ropeway na Lum Shyllong, ka la poi pynban sha ka jingïapyni bor hapdeng ki heh sorkar jylla bad ki nongshong shnong ka thaiñ Laban lem bad kiwei de ki riew ieid mariang jong ka thaiñ hi baroh kawei. Ka jingïapyni bor kaba thamula shibun eh, ka dei ha ka janmiet jong ka sngi balang, ha ka jingïalang ba la khot da U Bah Sanbor Shullai, MLA ka Laban.
Ngim tip na kano ka daw, ba u Bah Shullai, uba dei U MLA jong ka South Shillong, lada um shim ba ka dei ka jingïalang jong u, kum u myntri sorkar, ba un khot ïa ka jingïalang ha State Convention Centre kaba dei shabar jong ka Constituency jong u ban ïakren halor katei ka phang kaba la pynmih jingkhuslai bad jingsngewkhia jong kiba ïakhih kaba la sdang naduh ka 17 tarik u bnai Risaw mynta u snem da ka jingïaid paidbah kaba jai jai na Last Stop Laban shaduh ka jaka ba la thmu tei ïa ka Ropeway hapoh ka Riat Laban, Shillong.
Nangta na kaei kaba paw ha ki lad pathai khubor, la ïohi, ba ka jingïalang, ka dei kaba la khot ïa ki bun phew tylli ki seng, ba kynthup ïa ki sengbhalang, ïa ki seng kynthei bad wat ïa ki Rangbah Shnong bad katei ka la dei lypa ka jingbakla, namar ba u MLA, ula dei ban khot kyrpang bad ban pynthikna ruh ba ka jingïalang, kan dei bad ki khlieh jong kitei ki kynhun, lada dei U Rangbah Shnong bad U Secretary Shnong, U President bad U Secretary jong ka seng samla, sengbhalang bad seng longkmie; hynrei hangtei la shu khot lymbrum bad kiba bun ki ïa rung ïa mih katba mon.
Ha kaba kum katei ka jingïalang, kaba la heh bad la bun briew, u Bah Shullai, um dei ruh ban pynïaid hi dalade, ula dei ban ailad ïa ki nongïalam shnong, kiba na ka Constituency jong u hi, ba kin shimti ban pynïaid ïa katei ka jingïalang bad ba ki nongkren kin ïoh ban dumok bad ther katba ki sngewmon bad ba un sa ïoh pat ïalade, ban pyrkhat bad jubab katba kum ki mat ba la buh da ki riew paidbah.
U Bah Shullai, ula dei ban shai bha, ba ka jingïalang kaba u khot, ka dei bad kiba pyrshah ropeway bad kumno un khmih lynti shisha, ba kin don ki ban kyrshan ïa u, halor katei ka mat; hynrei kam mut pat, ba haba ki pyrshah, ba kan nym don shuh ka jingïakren, lane ba un shu phet jyndat noh na ka jingïalang bad ula dei ban ailad ba kin ther shwa ha ban da hun bad ba un sa pynjem jai, lyngba ki jingjubab jong u halor ki mat bapher, khamtam, haba ula don jingthmu ban leit ïalam ïa ki sha ïing u Myntri rangbah ka jylla.
To ngin kynmaw, ba ha ka jingkulmar kaba radbah ha Tura, ha kaba ka la don ka jingthang ïing thang sem ha U Lber ba ladep, hynrei U Conrad Sangma, kum u MLA jong katei ka Constituency, u mih dalade hi ban leit ïakren bad pynïasuk bad ki paidbah kiba la khie bitar, namar ka jingthep kyrteng ïa ki poiwir bad katei ka dei ka nuksa ïa u bah Sanbor ruh ba un ïaid da kajuh ka lynti.
La ïohi ruh ha ki lad pathai khubor ba ha ka jingïalang ba la khot da u MLA bad u Myntri sorkar jylla ha katei ka sngi ka la paw ba kam pat long shisha kata ka jingïalang kaba biang bha namar kumba la kynnoh da kiba pyrshah ba kadei tang ban dep rukom namar ba kiba don ha ka liang u Myntri sorkar ki kwah ban shna ropeway kumta ruh ha ka jingïalang la iohi ba kam don ka jingailad ban ïathir ïa kane ka phang bad la shu pynkut jubor bad ka jingkam ruh na u MLA ba kumba 99 percent ki kwah ropeway bad ma u ruh un sa ïoh ka jingjop kput bad kaba don burom ha u snem 2028 ka MLA election sha ka ïingdorbar thaw Aiñ ka jylla bad haba sngap ia kane ka jingkob lah ban kylli mano ba leh politik ne saiñ pyrthei ïa kane ka phang jong ka ropeway.
Na kane ka jingkwah jubor jong ka sorkar lyngba ka tnat jngohkai pyrthei ban pyntreikam ïa katei ka Ropeway Project ha U Lum Shyllong ka la pynlong ba katba nangmih ki sngi la ïohi ba ka Joint Action Committee kaba la ïalam ïa kane ka jingïakhih ka la nang ïohbor bad lah nang bun ruh ki sengbhalang, ki seng saiñ pyrthei, ki dorbar shnong, ki riew shimet bad ki riew paidbah naduh ki longkmie, longkpa bad wat ki samla bad khynnah ki la pynpaw bad leit ai jingkyrshan ïa kane ka jingïakhih ba don kam ban ïada ia ki tyllong um bad thung khambun ki dieng ha utei u Lum Shyllong bad sha kiwei pat ki jaka ba long khlaw na ka bynta ka lawei jong ki pateng ban wan.
Kumta halor kane ka phang ha kaba mynta la ïohi ba na ka liang ka sorkar ruh lyngba u Myntri ba khmih ïa ka tnat ki Kam Jngohkai Pyrthei u Bah Paul Lyngdoh u la khot biang ïa ki nongïalam jong ka JAC ban wan sha ka jingïatai nia da kaba buh ruh ki kyndon ba kan dei ban don ka jingsngap ïa ki jingpynsngew ym ban pynmih ki jingbitar ne ki jingïania, ïa kane ka mat ïa kumba ka long mynta hap ieh ha ka jingstad jong une u Myntri ba thymmai jong kane ka tnat ban lah ban tem ïa ki jingbitar, ki jingkynad kiba wat u MLA ka thaiñ u Bah Sanbor Shullai ruh um pat lah ban pynbeit ïa kane ka jingeh.

Leave A Reply

Your email address will not be published.