Ban ai mynsiem ïa ki nongdie ban plie dukan manla ka sngi, sdang ka Autumn Shopping Carnival

Nongpoh, Risaw16: Kum shi bynta ban ai mynsiem ïa ki nongshong dukan ha Nongpoh Town Shopping Complex ban plie ïa ki dukan jong ki man ka sngi, kumba bun na ki dukan ki ju khang khyrdep, ka Nongpoh Town Shopping Complex ryngkat ka jingïatreilang bad ka G&C Store mynta ka sngi ki la plie paidbah ïa ka iew synrai ne ka Autumn Shopping Carnival kaba la sdang naduh mynta ka sngi ka 16 tarik haduh 20 tarik mynta u bnai.
Ïa katei ka iew la wan ban plie paidbah da ka kong Rona Khymdeit MDC ka Nongpohk um ka kongsan, ha ka jingdonlang u Deputy Commissioner ka Ri-Bhoi District, ka kong B Ranee ADC ka Ri-Bhoi, ki ophisar na ki tnad sorkar bad kiwei kiwei.
Ha katei ka iew ki don bun jait ki tiar ki tar, ki jaiñ ki nep, ki dukan bam bad kiwei kiwei ba ki paidbah ki lah ban leit sha katei ka iew, ban kyntiew ïa ki nongseng dukan bad khamtam ba kane kan long ka jingpynmlien ba ki dukan kim dei ban khang khyrdep man ka sngi hynrei ban plie paidbah kumba kane ka iew ka long mynta, watla katei ka NTSC la plie paidbah la bun snem mynta.
Ha katei ka sngi na ka liang ka ophis u DC ka la sam ruh da ki syrnot bad pisa sha ki NSS volunteer ka Ri-Bhoi College kiba la trei shitom ban pynkhuid ïa katei ka NTSC.
Haba kren ha kane ka sngi na ka liang u DC ka Ri-Bhoi u Abhilash Baranwan u la ong ba kane ka dei ka thong ban ai mynsiem ïa ki nongshong dukan ha katei ka building ba kim dei ban shu shim ki dukan tang ban khang khyrdep, hynrei ban hikai ïa ki paidbah kiba la ïoh ïa ki dukan ba la mang daka sorkar ba kim dei tang ban shu khang khyrdep ïa ka hynrei ban plie man ka sngi namar ki don bun ruh kiba kwah dukan kim ïoh shuh.
Ka kong Rona Khymdeit haba kren ha kane ka sngi ka la ong ba kane ka dei ka kabu ïa ki nongseng dukan ba kin pynïaid iew ïa ki mar ki mata bad ki jingdie jong ki bad kyrmen skhem ba kane ka iew kan long ka jingkyrkhu ïa ki paidbah bad ai ruh ka jingkhublei ba kyrpang ïa ka Nongpoh Town Shopping Complex kaba la shim ïa ka sienjam ban pynlong kum katei ka iew ban pynphuh pynphieng ïa katei ka jaka pynlong iew ba man ka sngi ba ki paidbah ki ju kyntaid ban leit namar bun ki dukan ki ju khang khyrdep.