Nongpoh, Rymphang 01: U Myntri Rangbah ka jylla u Conrad K Sangma haba kren haka jingïalang ban pynlait ïaki kali kit ñiut ha ka sngi Palei ha Bhoirymbong u la ong ba kum ka sorkar ka don ka thong ba hakhmat eh ban wanrah ïa ka khuid ka suba haki shnong ki thaw bad ban pynlong kum kawei naki jylla ba khuid tam.
Ka sorkar kan sa pynbna kawei ka sngi man ka lai bnai ban sdang shuwa ka Financial Year jong u snem 2023-24 ban sdang naduh mynta (Fourth Quarter) ha kaba ka sorkar kan sa mang pisa naka bynta ki district, ki block bad ki shnong bapher bapher ban mih paidbah ban pynkhuid ïaki shnong ki thaw naka bynta ka thong ban pynlong ïa ka jylla kaba khuid bad lait naka jingbret pathar ïaki jaboh jabaiñ.
U la ong ruh ha katei ka sngi ba ka sorkar kan sa pynbna baroh ki nongïalam saiñpyrthei, ki nongtrei sorkar, ki nonghikai, ki khynnah skul, lem bad ki paidbah nongshong shnong ki dei ban mih paidbah ban pynlong kum ka sngi pynkhuid shnong ban shim bynta da ka mynsiem jong ka jingkitkhlieh na ka bynta ban wanrah ka khuid ka suba ha ki shnong.
