Wat bret ne leh jakhlia ïa ki wah, maham ka shnong 18 Mile ïa kiba leh khlem-akor

Mawkyrwat, Rymphang 01: Ka Shnong 18 Mile kaba hap hapoh jong ka Ranikor Civil Sub Division, South West Khasi Hills District ha ryngkat bad ka Seng Longkmie da ka jingsngewkhia ki la ïa mih paidbah ban pynkhuid ïa ki wah kiba don ha shilynter jong ka shnong bad ruh ïa ki pung sum.
Ka daw jong ka jingmih paidbah jong ka shnong ryngkat ka Seng Longkmie ka dei namar ba ki la lap shibun bah ki plastik, ki bilor ba na ka liang ki paidbah ki la leh khlem akor ym tang ki nongwan sum hynrei wat kiba leit ban wan ha shilynter jong ka surok ki ju mlien ban bret pathar khlem da ñiew kor ïa ka khuid ka suba jong ka mei mariang.
Ha kaba ïa dei bad kane ka bynta, na ka liang ki bor shnong lyngba u bah Fronstar Mawlein uba dei u Myntri jong ka Shnong 18 Mile ha ryngkat ka Seng Longkmie lyngba ka kong Diana Rngaid ki la pynpaw ka jingsngewdiaw halor kane ka bynta ba la lap shibun ki bilor, ki plastik tang na ka daw jong ka jingbym patiaw ki briew ban bret kulmar ïa ki jakhlia.
Kumta khnang ban lait na ki jaboh ka mei mariang, ka shnong ka thaw, ki wah duid kiba don hapoh shnong, ki la buh ka jingmaham ba tyngeh ba nangne shakhmat kin ym shah shuh ïa kino kino ki briew kiba wan bam khana, sait kali ne ban bret jakhlia ha kine ki wah hapoh jong ka shnong 18 Mile bad ïa kane ka rai ki la shim hadien ba ki la dep ban pynkhuid noh ïa ki wah da kaba ki la thoh ruh ki jingmaham bad lada ka shnong kan dang lap ïa ki briew kiba dang pynkheiñ ka shnong kan sa pynshitom katkum ki kyndon aiñ jong ka shnong, ong u bah Frontstar Mawlein.