Nongstoiñ, Rymphang 1: Ka thaiñ Rambrai ka dei ka thaiñ kaba dang don kam shibun bah ki kam pynroi la ka long ha ka pule puthi, ki surok, ka koit ka khiah bad kiwei kiwei. Hynrei kaba bynta kaba donkam tam kaba ki paidbah ki donkam kyrkieh ka dei ki jaka sumar kiba biang.
Kum ban pynkynmaw ba ha ka shnong Rambrai, ka la don kawei ka Primary Health Centre. Hynrei kumba ka long haduh mynta ki tiar ki tar na ka bynta ban sumar ïa kiba pang ba shitom bad wat ki jingthiah ruh kim pat biang satia.
Ha kaba ïadei bad katei ka jaka sumar, na ka liang ki nongïalam shnong ka thaiñ haba ïakren bad u nongthoh khubor, ki la ong ba ki la I donkam haduh katta katta ba ka sorkar kan kyntiew kyrdan noh ïa katei ka Primary Health Centre sha ka Community Health Centre. Namar naduh Mawphansyiar, Rambrai, Mawthir haduh Kyrshai nangta haduh ki thaiñ Synia, Mawdoh lem bad kiwei kiwei ki shnong kiba jngai bha ym pat don satia ki jaka sumar.
Ki nongialam shnong ki la ïathuh ruh ba san snem mynshuwa, na ka liang ki nongialam ka Federation of Khasi Jaiñtia & Garo People Rambrai Circle, ki la leit jurip ia ka jingtreikam ha katei ka jaka sumar bad ki la ïoh ban ïakren bad u Doctor, ha kaba u ong ba lada kheiñ ïa ka jingdon briew ha baroh ki shnong ha ka thaiñ kiba hap hapoh ka jingpeit jong u, ki la palat ia ka ar phew hajar ngut ki nongpang.
Haba kaba ïadei bad katei ka jaka sumar, la ïoh jingtip ruh ba naduh ki snem kiba la dep ka sorkar ka la pynkhreh shait shait ban kyntiew kyrdan noh ïa katei ka PHC sha ka CHC.
Ka la pyrshang ban wad jaka ban tei ïa ka CHC bad ka la dep ïoh ha kaba ka la dep pynkhreh lut nadong shadong, hynrei ym pat ïoh jingtip satia la ka sorkar ka la dep mang pisa ne em ha kaba ïadei bad ka jinglut jingsep na ka bynta ban tei ïa ka CHC.
