Nongstoiñ, Rymphang, 1: Ha kiba bun ki paidbah nongkyndong jong ka Jylla, ka jingtrei shitom ka dei ka lad na ka bynta ban kyntiew ïa ka ïoh ka kot bad ka kamai kajih. Kata ka long khamtam eh ïa kito ki nongshong shnong bad ki nongrep kiba don ïa ki jaka rep kiba biang.
Na ka bynta ki paidbah nongrep bad nongshong shnong ha West Khasi Hills, bun byllai ki dei ki nongrep ki bym don ïa ki jaka rep kiba biang. Watla ki dei ki briew kiba im da ka rep ka riang ruh, hynrei ki jaka ba ki rep khamtam ki pynthor ki dei kiba shu shim wai na ki trai jaka. Nalorkata la lap ruh ba ki rukom rep ki ïapher na kawei ka jaka sha kawei pat.
Haba phai sha ki mar rep ba kiba long salonsar bad ba ki paidbah ki ju smat ban rep ki long u kba ba ki ju rep ha ki pynthor haba la biang ka aïom rep. Kumjuh ruh ïa u riewhadem bad kiwei kiwei ki mar rep katkum ka aïom kaba dei ban rep.
La lap ba ki don ki paidbah nongshong shnong kiba don ki jaka rep ha pyntha Umyiap kum ka Nongspung, Mawkynbat, Nongrangoi, Lumpyngad, Mawsngapwir bad kiwei kiwei ki shnong, ki paidbah jong kitei ki shnong ki dei ki briew kiba trei shitom haduh katta katta ha ka rep ka riang bad kim ju pynsep ei ïa ki jaka rep jong ki hadien ba ki la dep lum ïa u kba.
Ha ka jingjurip ïa kitei ki jaka rep la lap ba ha katei ka pyntha naduh u bnai Nohprah man la u snem, ki paidbah nongshong shnong ki la sdang ban puh ban lur na ka bynta ban thung kiwei pat ki jingthung kum u phan, ki jhur kum u kajor, dhonia, motor bad kiwei kwei ki jait jhur.
La lap ruh ba man la u snem ha ki bnai ba la sdang ka aïom lyiur, ki nongrep katei ka thaiñ ki la bun kam bha ban lum ban lang ïa ki jhur ki jhep na ki lyngkha jong ki bad ka ïew Nongstoiñ ka dap da ki jhur kiba la pynpoi da ki nongrep na kitei ki shnong. Don ruh ki nongrep kiba lah ban pynpoi ïa ki jhur haduh Shillong kumba ar sien ha ka shi taïew.
Shuh shuh, haba phai sha katei ka pyntha rep ha Umyiap la lap ba ka jingpynbiang um ha ki jaka rep ha katei ka pyntha, kam pat biang satia bad ki jaka rep ki dang donkam shibun ka um na ka bynta ban pynkhlaiñ ïa ka rep jhur, namar ba ki aïom rep jhur ki dei ki aïom kiba rkhiang bad tyrkhong bha.
Kumta na ka bynta ban kyntiew ïa ka rep ka riang, ka sorkar ka la dei ban phai khmat kyrpang sha ki paidbah nongrep jong kitei ki shnong bad ban pynshlur ïa ki da kaba thaw ki lad ki lynti ban pynbiang um ha kitei ki jaka rep. Namar kumba long mynta ka jinghiar ka ioh ka kot ka la ktah haduh katta na ka bynta ki nongrep.
Bun ki nongrep ki pynpaw ba lada ka ïew ka hat jong ki mar rep ka long kum ha kine ki por ba la dep, ka jingtrei shitom jong ki ka shu sep ei bad ka jingduh nong ka long kaba jur. Kumta donkam ba ka sorkar kan shim lem ïa ka jingkitkhlieh ban thaw ïa ki lad ban pynneh ïa ka dor ka mur jong ki jhur.
