Shen yn pyndep ban tei noh ïa ka Jingkieng Dwarksuid hapoh u bnai Jymmang, ong u Project Director ka NHAI

Nongpoh, Lber 28: Kumba ka Jingkieng Dwarksuid ka la dei ka na ka jingkieng kaba la pynmih shibun ki huri hura hadien ba la synjor katei ka Jingkieng bad la poi u pud haduh ba ka sorkar jylla shi por ka hap ban tei da ka jingkieng Nar ban ïaid ki kali kit khia, hynrei kane ka jingeh shen kan sa kur noh namar ïa ka jingkieng ba la tei thymmai shen pyndep noh ban shngaiñ ki paidbah ha ka leit ka wan.
Halor kane ka jingsynjor ka Jingkieng Dwarskuid kaba dei hadien ba la don ki dak orpait bad ruh ba la don ka jingtwa khyndew ha katei ka Jingkieng, ka sorkar ka la teh pyrkhing ban ïaid ki Kali kit khia bad wat u District Magistrate u la dep ban pynjari da ka kyndon aiñ 144 CrPC ban shah ïaid tang ki kali ba kit hapoh ka 10 MT bad dei lyngba kine ki dak ki shin ba la mih shabar ba ka sorkar ka la khohreh ban shna da ka jingkieng ba thymmai khnang ban shngaiñ ki paidbah ha ka leit ka wan.
Kum ban pynkynmaw, ka sorkar jylla ryngkat ka NHAI ka la sdang ruh ban tei da ka jingkieng ba thymmai naduh u bnai Risaw 2022 bad ka jingpyntrei ïa kane ka jingkieng ka la ïaid shaid shaid bad ka long ruh ka jingshngaiñ ba lada lah ban pyndep kloi ïa kane ka jingkieng ba thymmai kumba katei ka Jingkieng rim ka la synjor bad wat katei ka jingkieng nar ruh kam long shuh ban pyndonkam.
Haba buddien halor kane ka jingshna ïa kane ka Jingkieng ba thymmai, u Mawphor u la ioh ban ïa kren lyngba ka Telephone bad u Project Director ka National Highway Authority of India, u Anand Singh Chauhan bad kumba la pynpaw da utei u Project Director u la ïathuh ba ka jingpyntrei ïa kane ka jingkieng ka la ïaid shaid shaid bad shen yn pyndep noh tang hapoh ka 40-45 sngi.
U la ïathuh ruh ba ka NHAI ruh ka la shim khia ban phah pynsted ïa ka kam ban pyndep ïa kane ka Jingkieng ba thymmai, namar kane ka Jingkieng ka long kaba donkam bha kaba la pyndonkam ym tang ki paidbah ka jylla bad kiwei kiwei ki jylla shatei lam mihngi ka ri India bad shisien ba la lah ban pyndep ka la pynsuk ïa ki paidbah khamtam ki Kali kit khia ki la ioh ban ïaid laitluid lyngba jong kane ka Jingkieng.
Haba kylla bad ban pynthikna haduh katno por lah ban pyndep purda, u Chauhan u la ïathuh ruh la kumno kumno tang hapoh u Bnai Jymmang 2023 la lah ban pyndep pura noh ïa kane ka jingkieng bad na ka liang ka NHAI ruh kan shim khia ban phah pynsted ïa ka kam bad lada la lah ban pyndep ka jingmyntoi ka long ïa baroh ki paidbah kiba pyndonkam ïa katei ka jingkieng kaba thymmai ba la trei ha ka jaka jong ka Jingkieng barim kaba don ha Dwarksuid, u la bynrap shuh shuh.