Jowai, Lber 28 : Ka Seiñ Kynthai Welfare Society Mihmyntdu (SKWS) kawei na ki seng jong ki longkmie kaba trei na ka bynta ka bha ka miat jong ka imlang ka sahlang ha kane ka 27 bad 28 tarik u Lber kala pynlong ïa ka WorkShop ne ka prokram ai jinghikai kyrpang ba ar sngi ha R.C. Eve Secondary School Mihmyntdu.
La pyntip ba ïa kane ka prokram la pynlong ha ryngkat ka jingïatreilang bad ka ophis District Social Welfare Officer, West Jaiñtia Hills, ha kaba la wan ïashim bynta da ki khynnah skul jong ka R.C. Eve School Mihmyntdu bad na ka Don Bosco Secondary School, Mookymphad Mihmyntdu.
Ha kitei ki ar sngi la ai jinghikai halor ki mat bapher bapher sha kitei ki khynnah skul da ki riew shemphang kiba kynthup halor ka Child Marriage Prohibition Act 2006 bala ai jingbatai da ka kong J. Synnah, District Social Welfare Officer, West Jaiñtia Hills, shaphang ka “Ill Effect of Teenage Pregnancy for Adolescent Boys and Girls” bala ai da ka kong Test Mary Suna, Matron Civil Hospital Khliehriat, ka ‘Juvenile Justice Amendment Act 2021’ la pynsngew da ka Ialam Sutnga, Outreach Worker DCPO, West Jaiñtia Hills, katba shaphang ka ‘Ill Effect of School Drop-out’ la batai da u S.D. Laloo, Community Mobilizer, SSA West Jaiñtia Hills.
Ha ka sngi pynkut ïa kane ka Workshop la wan ban donlang da ka kong M. Lakiang, District Mission Coordinator, SSA West Jaiñtia Hills kum ka kongsan, ïa ka jingïalang la pynïaid da ka Baiahunlang Phawa, President SKWS, Mihmyntdu la ïoh ruh ka jingkren na ka Jessica Biam, Asst. Secretary SKWS-Mihmyntdu, na ka Sister Sheela Thomas, Headmistress Don Bosco Secondary School, Mookymphad bad kumjuh ki kyntien sngewnguh na ka Sister Puspita Beck, Headmistress RCLPS School, Mihmyntdu.
Ka kong M. Lakiang haba ai jingkren kum ka kongsan kala ïaroh ïa ka seng ki longkmie ka ‘Sein Kynthai Welfare Society Mihmyntdu’ kaba don ka mynsiem ban kyntiew ïa ka bha ka miat na ka bynta ki khynnah skul bad kumjuh ïa ki nongshong shnong da kaba pynlong kum kine ki prokram ai jinghikai bapher bapher.
Ha ka juh ka por kala ai mynsiem ïa ki khynnah skul ba kin long kiba mihnot ha ki jingpule, ban don ka jingkitkhlieh na ka bynta ban pyndep ïala ka kamram bad ban ri ïa ka akor ka burom.
