Shillong, Nailur, 10: Ki samla pule doktor jong ka North Eastern Institute of Ayurveda & Homeopathy (NEIAH) Medical College Mawdiangdiang, New Shillong kiba dang pule mynta ïa ka Post Graduate (PG) ki la pynlong da ka jingïakhih shah thngan hadien ba kim shym la ïoh ïa ka ‘stipend’ kaba la 10 bnai kynthih.
Ka jingbym ïoh “stipend” ka la pynlong ïa ki samla pule ban ïakynduh jingeh ha kaba pynbit pynbiang ïa ki jingdonkam kiba manla ka sngi.
Ki samla pule kim shym la ïoh shuh ïa ka ‘stipened’ naduh ka 23 tarik, Nohprah 2023. Ha ka 10 tarik, Nailur 2024 ki la pynlong ïa ka jingïakhih ha phyllaw jong ka jaka pule da kaba shong kyllaiñ myngngor ha ryngkat ki jingthoh ha ki plakad ban dawa ïa ka bhah bad ka bainong kaba ki dei ban ïoh lyngba ka ‘stipened’ hynrei ki bor pynïaid ki la phah sangeh noh ïa ka jingïakhih da kaba pan por ar bnai eiei khnang ban dup lah ban pynurlong ïa ki mat jingdawa jong ki.
Hynrei wat hadien ar bnai ka jingpan por hynrei ki bor pynïaid kim shym la shimkhia satia. Dei halor kane ka daw ba kim banse ban mih shakhmat da kaba pynlong ïa ka jingïakhih.
Watla u nongthoh khubor u la pyrshang ban ïakren bad kine ki samla pule kiba pynlong ka jingïakhih hynrei ki la kyntait ban kren eiei bad ïathuh ba ki bor bahalor jong ka NEIAH ki la maham ba kim bit satia ban kren sha ki lad pathai khubor hynrei ki lah tang shu pynlong ïa ka jingïakhih hapoh kane ka jaka pule.
Ka jingïakhih jong ki samla pule doktor ka la sdang naduh ka step sngi Balang bad ka la ïaid mynta la 24 kynta tam naduh ba ki la pynlong ïa ka jingïakhih shah thngan.
Haba pyrshang ban wad jingtip, ka tyllong jingtip ka ïathuh ba wat hapdeng ki jingud jingnam bad ki jingpynsngew na ki samla pule sha ki bor ba dei peit hynrei ki nongpynïaid jong ka NEIAH kim shym la leh eiei ban shimkhia ïa ka jingdawa.
Ha kane ka jingïakhih ki samla pule ki la rah ïa ki plakad ba la thoh, “Called Hero But Paid Zero”, “Cheating in Education is a Crime, “One Year of Silence One Year Of Suffering” bad kiwei kiwei pat ki jingthoh.
