Nongpoh, Naiwieng 27: Namar ka jingtuid ki paidbah ban leit kai, bamkhana ha ki rud jong ka jaka pynmih bording ba la tip kum ka New Umtru Hydro Electric Project (NUHEP), Byrnihat, khamtam haki sngi shuti bad sngi u Blei, kaba la wanrah ruh ka jingduh jong kiba bun ki mynsiem briew kiba la ngam jyllop ha katei ka wah, u District Magistrate ka Ri-Bhoi District u Abhilash Baranwal katkum ka Section 163 jong ka Bharatiya Nagarik Suraksha Sanhita, 2023, u la khang pyrshah ïa ki paidbah ban leit sha ki jaka ba marjan bad ka New Umtru Hydroelectric Project (HEP), kynthup ïa ki bynta ba sharum jong ka flood zone, ban ïada na kino kino ki jingjia ba sngewsih.
Kino kino ki briew kiba pynkheiñ ïa kane ka hukum kin shah pynngat ha ki kyndon aiñ katkum ka Section 223 jong ka Bharatiya Nyaya Sanhita, 2023.
Ïa kane ka hukum yn pyntreikam da ki Pulit jong ka Ri Bhoi, ka ophis jong u Additional Chief Engineer (C), HP, MePGCL, Umiam, bad u Chief Engineer (HP&HC). MePGCL, Shillong bad ka ophis u BDO, Umling C&RD Block bad kane ka hukum kan treikam ha kitei ki jaka tad haduh ban da pynbna da kumwei.
