Dawa ka MPUF ban tohkit bad kem ïa ki trai Rehab Centre ka Assam halor ka jingïap ki arngut

Shillong, Naiwieng 27 : Ka Meghalaya Users’ Forum (MUF) ka la kyrpad ïa u Myntri Rangbah ka Jylla ban thung ïa ka jingtohkit bad ban kem ïa ki trai jong ki artylli ki Rahabilitation Centre ha Assam, halor ka jingiap jong ki arngut ki samla na Shillong ba leit sumar naka jingdih droks ha kitei ki jaka sumar.
Kine ki Rehabilitation Centre ki dei ka Better Wellness Living Foundation kaba don ha Mangaldai, Assam, kaba long trai da u Arup Jerial Passah bad Sabir Khan lem bad ka Alive Again Foundation kaba don ha Chandrapur, Hatisila, Guwahati, kaba long trai da u Arup Jerial Passah bad u Shahid.
Kane ka jingdawa ka la mih hadien ka jingiap ki arngut ki samla na Shillong ba leit sumar ban lait noh na ka jingdih droks- u samla Rickelson Jyrwa ba na Chandmari, Syiap, Golflink, Shillong bad u Meban Syndor uba na Mawlai Mawtawar, Shillong.
Ka MUF kala aiti da ka dorkhas sha u Myntri Rangbah ka Jylla Conrad K Sangma, kaba pynpaw ba ïa ka met jong u Meban Syndor la aiti sha ki bahaiing hasem da ki nongpynïaid ka Rehab Centre khlem ka jingtip ki Pulit ne ïaid kat kum ki kyndon aiñ kum ka jingleh post mortem bad kiwei kiwei. Ka ong ba kum kine ki jingleh ka pynsngew artatien ïa ka jingtreikam jong kine ki centre.
Ka la kam ruh ba ka la ïoh pdiang ïa ki khubor na ki nongdih droks ha kine ki centre ba ki ju shah leh beiñ, leh tohmet bha. Ka pyntip ba ka MUF ha ryngkat ka jingïatreilang bad ki lad pathai khubor, ka Association of Drugs Rehabilitation Centre nalor ka State Anti-Drugs and Prohibition Council na Assam, kila ïatrei borbah ban sei madan ïa ki kam bym hok bad jing leh tohmet ïa ki nongpang da u Arup Jerial Passah bad ki briew ba ïadon bynta lang bad u.
Ka MUF kala pyntip ba ha ka 25 tarik Naiwieng, 2024, la ïoh ban pyllait ïa kumba 200 ngut ki nongdih droks na kine ki jaka sumar bad kine ki briew ki la ïathuh khana ïa ki jingshah shoh bad shah lehbeiñ, ïa kiba la pynmih ruh ha ki lad pathai khubor.
Namar kane, ka MUF ka la dawa ban pynlong ïa ka jingtohkit halor ka jingiap u Rickelson Jyrwa bad u Meban Syndor bad ban kem bad pynsajia ïa u Arup Jerial Passah bad ka kynhun jong ki, kiba don bynta ha ki kam leh tohmet ïa ki nongpang.
Ka MUF kala dawa ruh ban pynthikna ba ym dei ban shah ïa kino kino ki briew ne kynhun ba kin bat, shoh ne byrngem byrsit ïa ki briew ba dih droks bad ban leh tyngeh ha ka ban pynsangeh ïa ki kynhun kiba bat ïa ki nongdih droks, kaba pynkheiñ ïa ka hok tynrai jong u briew.