Shillong, Naiwieng 27 : Ka Kynhun Myntri jong ka Sorkar Jylla ha ka sngi Balang ka la mynjur ïa ka skim ba kyrpang na bynta ki nongthoh khubor ha ka jylla ïa kaba la tip kum ka Meghalaya Journalists Welfare Scheme, 2024.
Ïa kane la ïathuh da ka Myntri ka tnad ka Koit ka Khiah ka Sorkar Jylla bad Information & Public Relations, Kong Ampareen Lyngdoh haba kren bad ki lad pathai khubor hadien ka jingïalang jongka kynhun Myntri.
“Kane ka skim kan treikam noh bad ngi sngew kmen ba ngi la lah ban pynurlong ïa kane. Ngin sa nang ïai pyntip na ka por ïa ki jingmyntoi kiba ki nongthoh khubor ki lah ban myntoi na kane ka skim,” ka la ong. Shuh shuh ka la ïathuh ba ka jingpyntreikam ïa kane ka skim kan dei naduh ka 01tarik Nohprah, 2024.
Haba pynshai bniah ïa ki jingmyntoi ba ki lad pathai khubor ki lah ban ïoh, ka Myntri ka ong ba na ka 1lak tyngka kaba ju ai mynshwa sha ki nongthoh khubor kiba la khlad noh mynta ka sorkar ka la kyntiew sha ka 5lak tyngka. Ka la ïathuh ruh ba na bynta ka jingkyrshan pisa na ka bynta ki jingshitom kiba la kham jur kaba ju ai mynshwa 50,000 tyngka, mynta ka sorkar ka la kyntiew sha ka 3lak tyngka.
Ha kajuh ka por ka la ïathuh ruh ba kan don ka komiti kaba la thaw da ka sorkar kaban peit bniah ha ka jingpyntreikam pura ïa kane ka skim na bynta ka jingmyntoi ki nongthoh khubor.
Katkum ka jingïathuh jong ka, ka sorkar jylla ka sngewkhia bad shimkhïa ïa ki nongthohkhubor kiba la rejistar bad ka sorkar jylla ban ïoh ïa kitei ki jingïarap kiba long katkum ka jingshakri bad ka jingaiti met bad mynsiem jong ki ha ka kam.
La ïathuh ruh ba ki aiti ha ka komiti kaba la thaw ban peit na ka bynta kane, wat ha kaba ïadei bad ka jingkyrshan pisa kyrpang na bynta ki nongthoh khubor kiba la rangbah ha ka kam kiba dei hok ban ïoh ïa kane ka jingkyrshan pisa.
