Nongpoh, Naiwieng 27: Ka KSU, North Khasi Hills Eastern Border Area mynta ka sngi ka la leit ban ïakynduh syndon ïa ka DMHO ka Ri-Bhoi District na ka bynta ban buddien bad ban pan ka jingpynshai ha kaba ïadei bad ka jingkhlad noh jong I khyllung ba dang 2 snem ka rta ba la kynnoh ruh ba dei na ka jingbakla ai injekshon ha CHC Bhoirymbong, wat hadien ba ki kmie ki kpa pynkynriah noh sha Nazareth Hospital na ka bynta ka jingsumar ba kham hynrei namar ka jingshitom kaba jur itei I khyllung I la khlad noh syndon na kane ka sla pyrthei.
Haba kren sha ki lad pathai khubor hadien ka jingïakynduh bad ka DMHO na ka liang u Bah Banjop Maring President ka President ka KSU North Khasi Hills Easter Boder Area haka jingsynrang lang bad kiwei ki dkhot ki la ai ruh da ka jingthoh sha ka DMHO ban dawa pynlong ïa ka jingtohkit kaba khuid ïa katei ka jingkhlad itei I khyllung la ka dei shisha na ka jingai injekshon kumba la kynnoh da ki kmie ki kpa ne na kiwei ki daw jong ka jingpang jingshitom.
U la ong ruh ba kum ka seng ka kwah jingshai bad ka jingtohkit kaba khuid halor katei ka jingjia khnang ba kan nym wanrah ka jingtieng jingsmiej ïa ki paidbah haba leit ban phah sumar ha katei ka jaka ai jingsumar bad ban pyntip paidbah ïa ka jingshisha kaba mih na katei ka jingtohkit bad na ka liang ka DMHO ka la pyntip ba ka la dep ban pynlong ka jingtohkit halor katei ka jingjia bad ka jingtohkit mynta ka dang ïaid shakhmat.
