Ka jingrem ka Congress ha Gambegre imat dei ba ki paidbah kim mon ïa u kyrtong

Shillong, Naiwieng 27 : U Vice President jong ka Meghalaya Pradesh Congress Committee (MPCC) ba dei ruh u MLA ka Mylliem ha ka sngi Balang u la ong ba ka daw ka jingrem u kyrtong ka Congress ha ka elekshon shiteng samoi ba dang shu lah ha Gambegre ka lah ban dei na ka daw u kyrtong.
“Ka lah ban dei imat ba ki paidbah kim da mon ïa u kyrtong jong ka Congress lane ka lah ban don da kiwei pat ki daw,” u la ong haba kren bad ki lad pathai khubor.
Kumban shu pynkynmaw, u kyrtong ka Congress u Jingjang M Marak u la wan haduh ka kyrdan kaba lai da ki 7695 vote, katba ïa ka kyrdan kaba ar la ïoh da ka kyrtong jong ka TMC, ka Sadhiarani M Sangma da ki 8084 vote. Katba ka kurim jong u Myntri Rangbah, ka Dr. Mehtab Chandee Sangma ka la ïoh haduh 12678 vote bad tam haduh 4594 vote ïa ka kyrtong ba wan ba ar.
Ha kajuh ka por u ong ba ki paidbah ha man la ki elekshon shiteng samoi ki kham noh ka mon sha ki party ba don ha ka liang synshar imat ba ki kham ïoh bun ki jingmyntoi.
“Phin da peit bunsien ha man ki elekshon shiteng samoi ki paidbah ki kham ïa beh hi sha ki party kiba don ha ka bor. Kadei ruh ka jingshisha ba kito ki party ba don ha ka sorkar kin pyndonkam beit da ka buit ka bor ba ki don,” bynrap biang u Bah Ronnie.
Haba jubab halor ka jingkylli kumno ka lyer Congress ka hiar kynsan khamtam haba dang ha ki khyndiat bnai ki la pynjop donburom ïa u kyrtong MP na ka party, une u MLA u la ong ba ha ka elekshon MP ki paidbah ïa ka jinglong jingman ha ka ri da kaba buh hakhmat kano ka party kaba lah ban ai jingïada ïa ki kum ki riewlum.
“Hynrei ha ka elekshon MLA khamtam ha ka elekshon shiteng samoi kum kita ki jingtieng kim don bad dei na kane ba ki paidbah ki jied kat ha la ka mon,” u la bynrap biang.