Shillong, Naiwieng 27 : Ka Meghalaya ka la jop ïa ka takma rupa napdeng ki jylla bad ki Union Territory na ka bynta ka jinglah ban pynitynnat ïa ka jingpynriam pynbeit ha ka 43rd India International Trade Fair 2024 ba la pynlong da ka India Trade Promotion Organization ha ka jingsam khusnam kaba la long ha ka 27 tarik, Naiwieng, 2024 ha Bharat Mandapam, New Delhi.
Ïa ka khusnam la pdiang da u Director ka Meghalaya Pavilion u WG. Momin, ha ka kyrteng jong ka Directorate of Information and Public Relations ha kaba la sakhi lang da u Public Relations Officer jong ka DIPR, u Bah SL Mawlong, u Functional Manager, Nongstoin u Bah BF Sunn, u Functional Manager ka Ampati, Commerce and Industries Department u AD Shira.
Ïa ka khusnam la aiti da u Chairman bad Managing Director ka ITPO u Pradeep Singh Kharola uba la long kum u kongsan.
Ïa ka India International Trade Fair la pynlong da ka ITPO naduh ka 14 tarik haduh ka 27 tarik Naiwieng halor ka phang, “Viksit Bharat @2047” kaba ïahap bad ka jingthmu jong ka India ban long ka Ri kaba kiew shakhmat, kaba pynpaw ïa ka jingkiew shaphrang, ka jingshem ïa kiba thymmai bad ka kolshor tynrai.
Ki la don bun tylli ki jylla kiba wan ban shim bynta ha kane ka Trade Fair, kynthup ïa ki Union Territory, ki tnad bapher bapher jong ka Sorkar Pdeng bad kumjuh ki kompeni shimet na kylleng ka ri India.
Ki tnat kiba mihkhmat ia ka jylla Meghalaya ha ka IITF 2024 ki kynthup ia ka Tourism, Commerce and Industries, Meghalayan Age Limited New Delhi bad ka Directorate of Information and Public Relations.
Nalor ki tnad sorkar ki don ruh haduh 8 tylli ki unit kiba la kyrshan da ka Directorate of Commerce and Industries kiba la shim na ki bynta bapher bapher jong ka Jylla kiba shim bynta lang ha kane ka iew ban pyni bad pynïaid ïew ïa ki mar tynrai.
