ïatreilang ka IOC, ka FICF bad ka Sorkar Jylla ban wanrah ïa ki kor sumar khyllai ha Jylla

Shillong, Naiwieng 27: Kum shibynta ban pynïoh ïa ki lad jingsumar ha baroh ka thaiñ Shatei Lam Mihngi ka ri India, ka Indian Oil Corporation Limited (Indian Oil) ka la ïasnohkti bad ka Fairfax India Charitable Foundation ban iatrei lang bad ka Sorkar Meghalaya ban pynbiang ïa ki 6 tylli ki Haemodialysis Machine ne ki kor sumar khyllai na ka Pradhan Mantri National Dialysis Program (PMNDP).
ïa kane ka jingïatreilang la pynskhem lyngba ka jingïasoi ïa ka soskular hapdeng kine ki 3 liang mamla ha Nongbah Guwahati.
Ka jingpang Khyllai ne Kidney ka dei kaba jur bha bad kaba buh jingeh bha ïa ka koit ka khiah jong ki paidbah ha ri India, kaba la ktah ïa kumba 1.3 million ngut ki nongpang kiba donkam ban leh ïa ka haemodialysis kata 2-3 sien ha ka shi taiew.
Ha baroh kawei ka ri, ka jingdawa ïa ki Haemodialysis Machine kala palat lypa ïa ka jingdon jong kine ki kor, ha kaba la don tang 35,000 tylli ki mashin katba ka jingdonkam pat ka long palat ïa ki 200,000 tylli. Na ka bynta ki nongshong shnong ha nongkyndong, ka jinglut jingsep ban leh ïa ka Haemodialysis ka kot sha ka (2.4 lak shi snem), nalor ka jingshem jingeh ha ka leit ka wan bad ka jaka sah kaba la buh haka jingeh kaba khraw ban ïoh ïa kane ka jingsumar ban ïada ïaka jingim.
Ka jinglong jingman jongka koit ka khiah ha jylla Meghalaya ka kham jynjar bha bad bun ki district ki duna ïa ki jaka sumar ban leh ïa ka Haemodialysis, kaba ki jaka sumar kiba la don lypa kila mad ïa ka jingkiew ha ka jingjur jongka jingdawa. Ka jinglong ki jaka ka jylla kala nang pynjynjar shuh shuh ban poi sha ki jaka sumar kiba don ha sor bad ka la pynlong ïa ki nongpang na ki thaiñ nongkyndong ryngkat bad ki bahaïing hasem ban khia ka jingkit ha ka jinglut jingsep ban pynbiang ïa ki jingdonkam.
Katei ka jingthmu kan ai jingmyntoi ïa ki nongpang kiba don ha ki district kum ha East Garo Hills & Ribhoi bad ka thmu ban pynduna ïa ka jingsangeh noh jong ki nongpang ïa ka jingsumar namar ki jingeh ha ka liang ka jingpynbiang ïa ki jingdonkam, ban pynduna ïa ka jingiap bad ban thaw ïa ki lad kamai ha ka koit ka khiah hapoh kitei ki thaiñ.
Haba kren ha ka jingialang u Udit Jain, Chief General Manager (HRD & ER), ka Indian Oil, ula ong, “Kane ka jingïatreilang ka pyni ïa ka bor jongka jingïatreilang hapdeng ka sorkar bad ki riewshimet ha ka jingïakhun pyrshah ïa ki jingeh kiba kongsan ha ka koit ka khiah. Da kaba pynïoh ïa ka jingai jingsumar lyngba ka Hemodialysis, ngi ïengskhem ha kaban wanra ïa ka jingsumar kaba lah ban ïada ïa ka jingim briew ha ki shnong kiba duna ka jingïoh ïaka jingshakri ha kylleng ka thaiñ.”
Haba bynrap ïa katei, u Hitajit Bhattacharyya, u Chief General Manager (Human Resource), Guwahati Refinery, Indian Oil Corporation Limited ula ong, “Ka thong jong ngi ka long ban pyndap ïa ka jingduna ha ka liang ka koit ka khiah ha kane ka thaiñ Shatei Lam mihngi. Kane ka sienjam ka dei ka sakhi ïa ka jingaiti jong ka Indian Oil ban pynbiang ïa ki jingshakri ha ka koit ka khiah kiba ïaryngkat ha ki jaka kiba don ha ki jaka kiba bha”.
Ula ong, ba ka jingnoh synniang jong ka Indian Oil ïa ki 6 tylli ki Haemodialysis mashin kan nang pynkhlaiñ shuh shuh ban wanrah ïa ki jingshakri kaba jan ïa ki shnong kiba duna ha ka jingïoh ïa ka jingshakri bad kan pynbha shibun ha ka liang ka koit ka khiah. Kane kan ïarap ïa ki shnong ki thaw ha Meghalaya ki bym don ïa ki lad ki lynti kiba lah ban ïada ïa ka mynsiem briew.