Shillong, Naiwieng, 27: Ka kurim jong u Myntri Rangbah ka Jylla ka Dr. Mehtab Chandee A. Sangma ha ka sngi Balang ka la bam smai kum ka MLA bathymmai jong ka Gambegre Constituency bad buh ruh hakhmat ïa ka thong ban peit ïa ka jingbit jingbiang ha ka koit ka khiah, ka bording, ka surok kiba long ki jingdonkam ba kongsan eh.
La pynbam smai ïa ka Dr. Chandee da u Lamphang jong ka Ingdorbar Thawaiñ ka Jylla u Thomas A. Sangma ha kaba la sakhi lang da u Myntri Rangbah ka Jylla u Conrad K. Sangma uba long ruh u National President jong ka NPP, ki nongïalam ba hakhmat ka party.
Ka Dr. Chandee ka la long ka kynthei kaba saw ban ïoh rung ha ka Ingdorbar Thawaiñ hadien ba ka la lah ban pynliem noh ïa ka Sadhiarani Sangma ka kyrtong jong ka TMC da 4594 vote ha ka elekshon shiteng samoi ba dang shu dep long shen.
Haba kren sha ki lad pathai khubor, kane ka MLA ba thymmai jong ka Gambegre ka la ong, “ka dei ka kam kaba eh haba nga pyrkhat namarba ha ka sain pyrthei ka dei kaei kaei kaba dawa shibun bad nga kyrmen ba ngan lah ban pynurlong katkum ka jingkhmih lynti jong ki paidbah.”
Ka la pynthikna ban weng ïa ki jingeh ba ki paidbah ki ïakynduh hapoh ka Constituency khamtam ha kaba ïadei bad ka koit ka khiah, ki surok bad ka bording.
“Ha kine ki khyndiat bnai ba nga la ïaid kylleng hapoh ka Constituency, nga la ïohi ba ka thaiñ ka kham sahdien khyndiat haba ïa nujor bad kiwei ki bynta jong ka rilum Garo bad ki lah ban don bun ki daw kiba pynlong ïa kata hynrei nga sngew ba ki dang don ki kam ba dang dei ban leh kum ka koit ka khiah, ki surok bad ka bording namarba dang bun ki shnong ki bym don ïa ka bording, bun ki skul kiba la jot rathai bad ki dang don bun bah ki shnong ki bym pat pynïasoh da ki surok bad nga nga pyrkhat ba kita ki dei kiei kiei ki ban long ki bynta bakongsan tam bad nga la pyrkhat ba ngan shim shwa ïa kine ki mat,” la ong u Dr Chandee.
Da kaba pynpaw ba ki paidbah ka Gambegre ki la jied na ka bynta ka roi ka par, ka la ong, “hooid, nga pyrkhat kumta hi ba ki paidbah ki la sngewthuh bad ki ladep ïohi ha ki snem baladep ba ym shym la don eiei bad dei na kata ka daw ki kwah ban don hapoh ka sorkar bad nga ngeit ba kata hi ka dei ka lynti kaba ngi la jied.”
Haba kylli, kane u MLA ba dang shah jied thymmai ka la ong, “ha,oid, phim lah ban khmih lynti ïa kajuh ka jinglong namar nga dei ka briew kaba pher bha na kaei kaba u Saleng u long. Nga tharai ba u don da kawei pat ka jinglong bad nga ruh kumjuh. Ngan sa shimkhia ïa ki mat hynrei ym kiba u ladep leh bad nga pyrkhat ïa kiei ki mat kiba ïadei bad ka bha ka miat jong ki paidbah.”
Haba pynskhem ïa ka jingdonkam jong ki kynthei ban ïadon bynta ha ka sain hima sima, ka Dr Chandee ka la ong, “ha ka jingmut kaba kyllum nga la ju ong ïa kane ba ki kynthei ha ka sain pyrthei ki duna bha. Nga pyrkhat ba kata ka dei ka jinglong kumno ka sain pyrthei ka la long namarba ka dei ka kam kaba eh bha bad ka dawa bha bad nga pyrkhat ba ngi kum ki kynthei bad kum ki nongïashim bynta kiba ïaryngkat ha ka imlang sahlang ngi dei ban mih kham bun bad ïashim bynta kham bun. Nga shu kyrmen ba bun ki kynthei ruh kin ïoh ïa ka jingpynshlur ba ki dei ban mih shakhmat ban ïashim bynta ha ka saiñ hima sima.”
