Shillong, Lber 23 : Mynta ka sngi u Symbud Myntri Rangbah ba khmih ïa ka Tnad PWD (Roads) Bah Prestone Tynsong ula pyntip ha ïing Dorbar ba ka Tnad ka la sdang mynta ban thied jaka na ka bynta ban pynheh ïa ka surok National Highway-6 (NH-6) sha ka surok 4-Lane ne kiba ngiam ban iaid saw tylli ki kali ha kajuh ka por.
Haba jubab ha ka kynta kylli jingkylli, u Bah Prestone ula ong ba ka jaka sdang jong kane ka surok 4-lane jong ka NH-6 ka dei na Lad Umroi haduh ha Ratacherra bad ïa kane ka project la khot kum ka ‘Economic Corridor”. Kane ka project ka dei kaba la shimkhia da ka Sorkar pdeng.
Ula pyntip ba ka Tnad ka la pyndep ïa ka kaiphod ba biang ban pyntrei ïa ka project (feasibility) bad mynta ka dang pynkhreh ïa ka Detailed Project Report (DPR).
“Ka kam ban thied jaka ka la sdang bad nga thikna ba kan sa dep noh kloi bad ka jingkhot tender ruh kan sa long noh hi” ong u Bah Prestone.
Ka MLA ka NPP na Saipung-Sutnga ka Kong Santa Mary Shylla ka la kyrpad ïa ka Sorkar ban pynkloi noh ïa ka jingshna ïa ka surok 4-lane jong ka NH-6 namar kane ka surok ka dei kaba kongsan ïa kiba bun ki Jylla ha ka thaiñ Shatei Lam Mihngi.
Haba pynsngew ïa kajuh ka sur, u MLA ka UDP na Mokaiaw ua ma Nujorki Sungoh ula ong ba ki paidbah ki la sahkut da ki 6-7 kynta ha ka jingdheng kali ha NH-6 bad kyrpad ïa ka Sorkar ban pynïoh noh kham kloi ïa ka mang tyngka jong kane ka surok.
Ula kyrpad ruh ban maramot noh mardor ïa ka surok Jowai By-Pass kaba la jot rathai mynta.
Halor kane, u Symbud Myntri Rangbah ula pyntip ba ka Tnad ka la dep ai ïa ka work order ba 11 klur haduh 12 klur tyngka kumba la mang bad la dep bthah ruh ïa u contractor ban sdang noh mardor ïa ka jing maramot ïa ka surok Jowai-By-pass.
