Shillong, Lber 23: Ka Hynñiewtrep Youth’s Council ha ka sngi Palei ka la leit ban ai khublei ïa u Bah Adelbert Nongrum u MLA ka North Shillong halor ka jingwanrah jong u ïa ka Bill ïa kaba la tip kum ka The Meghalaya Selection of Candidates for State Quota Seats to Higher Academic Course Bill, 2023 ka Bill kaba ïadei bad bhah leit pule sha ki jingpule kiba kham shalor kum ha ki laiñ doktor, enjiniar bad kiwei de na ka bhah ba ka sorkar pdeng ka mang na bynta ka jylla.
Haba kren sha ki lad pathai khubor hadien ba la dep ban ai khublei da kaba ïa u song syntiew ïa u Bah Adelbert, u Bah Robertjune Kharjahrin u President ka HYC u la ong ba ha ka jingshisha kane ka Bill kaba u Bah Adelbert u la wanrah ka dei kaba biang bha bad kaba dei ruh ban shim nongmuna ha ka jingpyntreikam ïa ka Reservation policy namar kam don kano kano ka jingïaphiah jaidbynriew hapdeng ki Garo bad Khasi hynrei kat kiba pas bha ha ki jingpule klas 12 kin ïoh ban leit pule na ka quota jong ka jylla.
U la ong ba wat la na ka liang ka seng kam mynjur 100 na ka 100 namar ki don ki mat kiba donkam ban pynbeit hynrei na ka liang ka seng ka ai khublei ïa ka sienjam kaba u Bah Adelbert u la wanrah.
