Shillong, Lber, 23: U Myntri ka tnat Sam Bording u Abu Taher Mondal ha ka sngi Palei u la pyntip ba ïa ka kaiphod jong ka Inquiry Committee kaba la thung ban tohkit halor ka jingkynnoh ba la pyndonkam bakla ïa ka Saubhagya Scheme ladep phah sha ka Finance Department ba kan ai jingkynthoh.
“Tad haduh ba ka Finance Department kan da ïa ka jingkynthoh ngin sa lah ban ong la ki don ne kim don ki jingpyndonkam bakla,” ong u Mondal haba juban ïa ka jingkylli ba la wanrah da u MLA ka Congress na Umsning u Dr. Celestine Lyngdoh ha kaba ïadei bad ka jingkynnoh ba la pyndonkam bakla ïa kane ka skhim.
Shwa kane, u Myntri u la pyntip ba ki don baroh 53 tylli ki shnong kiba la ïoh jingmyntoi na ka Saubhagya scheme haoh ka Mawkynrew Block tad haduh u bnai Rymphang, mynta u snem.
Haba u MLA ka Mawkynrew Constituency u Bah Banteidor Lyngdoh u la kylli kaei ka daw ba ki 72 tylli ki shnong kiba hap hapoh ka Block kim shym la shah kynthup ha kane ka skhim, u Mondal u la ong ba kane ka dei na ka daw ka jingbym don pisa.
Katkum ka jingong jong u, tang T. 657.05 klur ka Sorkar Pdeng ka la mang pisa na ka bynta pyntrei ïa ka Saubhagya scheme.
