Pynibor ki trai jaka ha 7 mer ïa ka PHE ba pyntrei ïa ki pipe um khlem da ïoh jingbit

By Mawphor News Desk On Mar 24, 2023

Shillong, Lber, 22: Ka tnat PHE kaba la pyntrei ïa ki pipe um jong ka Greater Shillong Water Supply Scheme (GSWW) ha ka thaiñ 7 Mer, Upper Shillong ka la ïakynduh mawsiang hadien ba u Bah K. Rapsang uba long u trai jaka u la pynsangeh mardor ïa ki nongtrei jong ka tnad PHE, ka tnat Forest bad ïa ki Pulit ban rung sha ka jaka jong u halor ka jingkynnoh ba ka tnat PHE kam shym la siew satia ïa ka bailutksan.
U Bah Rapsang u la ïathuh ba ka daw kaba u la hap ban pynsangeh ïa kane ka jingtrei ka long halor ka nongrim ba ka tnat PHE kam shym la siew satia ïa ka bailutksan sha u Bah K. Rapsang uba long u trai jaka.
U la ïathuh ruh ba ki Pulit jong ka Jhalupara Out Post ki la wan da ka bor ban phah pyntrei jubor ïa ki pipe um hynrei u Bah Rapsang ryngkat bad ki nongtrei ki jong u, ki la ieng pyrshah bad khlem ailad satia ban pyntrei ïa ki pipe um.
Naduh ba ki kompeni shna surok Four Lane bad kiba pyntrei ïa ki pipe um ki la pyntrei ha kane jaka, na ka liang jong u Bah Rapsang u la ïathuh ba u la phah bun tylli ki shithi ban pan jingpynshai na ka ophis Deputy Commissioner, Forest, Revenue, PHE bad NHIDCL halor ka jingpyntrei khlem da siew ïa ka bailutksan sha ki trai jaka hynrei haduh mynta um shym la ïoh ïa kano kano ka jubab.
“Kumta la shim da ka rai ban buh noh da ki nong ap ban khnang ba ïa ki jingpyntrei baroh kat bym pat siew ïa ka bai lutksan yn ym lah satia ban pyntrei,” u la ong.
“Ngim khnang ïa kino kino ki kam pynroi ha ka thain hynrei ai ba kin wan da ka lynti kaba beit ban nym kulmar bad sahkut ki projek kam pynroi,” la ong u Bah Rapsang.
“Ka jaka hangne ha ri Khasi ka long ba ym ju lah ban die duh 100 snem mynshwa. Ki Phareng haba ki tip ïa kata ki shu shim wai na ka bynta 99 Snem bad haba ki Phareng ki mih noh na India ha u snem 1947 ka dei ka kamram jong ki jylla kiba hap hapoh ka ri India ba kin ïakren bad ki trai kyndew la kin bteng shwa ban shim wai ne kin pynkut noh ïa ka jingshim wai,” la ong u Bah Rapsang bad bynrap, “hynrei ka jingleh donbor jong ka Forest Department ban kam trai ïa katei ka jaka wat hadien ba la kut ka por ban shim wai, ka pynlong ïa ki paidbah nongshong shnong ka jylla Meghalaya ba kin artatien ban ai jaka ïa ka Forest Department ban thung dieng namarba kin sa thombor bad kam trai wat hadien ba la kut ka por ba la ïakut.”
“Ngi sngewsih ba ka kompeni shna pipe um ka la pyn julor bad pom pathar ïa ki dieng ha kane ka jaka haduh ba la i saitmet ban peit. Ngin nym ailad ïano ïano ban shim ei ïa ka jaka jong ngi khlem da siew ïa ka bailutksan bad ngin nym ailad ïa ka tnat PHE, ïa ka NHIDCL bad kiwei kiwei ban trei suk khlem da siew,” la ong shuh shuh u Bah Rapsang.